Bi rişutho ‘U sebyono hiro di athto kıxolıq dactith hiro d’camo’ u Huyodo da Neşe d’Bethnahrin-HNB, frısle buyono bi ohnutho di mşatsonuthayde.

BETHNAHRİN – Bu yawmo şatonoyo da 22 eşne di mşatsonutho du Huyodo da Neşe d’Bethnahrin, u Mawtbo d’HNB frısle buyono u mırle; bi mşatsonutho du Huyodo 28 d’Şbot da 2001 bu makthabzabno du camaydan htif warqo hathto leşan di athto du camaydan. Bi ohnutho du yawmo şatonoyo da 22 eşne d’HNB, kımhanena a noqufaydan kulle.   

Bu makthabzabno, u camaydan mafıt ma qtolğense, qtil u diş leşan dmitatimo i marduthayde, u leşonayde, i hiyoyuthayde wi haymonuthayde. U Sayfo dan 1915 trele u camaydan dcoyış trauma u dmıtwır u tukhlonayde. Bu nfoqo mu athro, bi goluthoste mşarele u qrobo dmitafşır u camaydan, drohıq mu athrayde umu makthabzabnayde. Wa neşe du camaydan’ste hzelın husrono rabe ma gunhani.   

HNB komır; “dilonoyo ba eşne haroyani, u cnufyo dhawi cala neşe zayıd,howe mu qedomo mwaxro du gawro aw da sisteme du emperyalizm. A hjome dkowe cala neşe dmıdde duktho bu haqlo folitiqoyo, kmitaşe rdufye u cnufyo guşmonoyo u nafşoyo u kmi’akıd u isticmal du ğenso di athto xıd ale du zebono uli xıdme da sisteme feodal u emperyalizm. İ nfıqto du Mawtbo Umthoyo d’Bethnahrin bi rişonutho du Rişono Mikhayel Naim Hadodo khliq sabro beyn du camaydan udi athto du camaydan.”    

Bi falsafe du Rişono d’MUB mşatıs u Huyodo da Neşe d’Bethnahrin, leşan i athto dmathlo u ğensayda bgawe du camo u bgawe d’MUB. HNB sımle mtaksutho umthoyto u ğensoyto, u kfolıh li hirutho, uli şawyutho di athto Suryoyto, kınofıq mqabıl dkul şıkıl mwakhronutho, u cnufyo dkowe cala neşe, b’nişo i athto du camaydan dlo fayşo hkımto ma sisteme dıkcayşo ebaye, elo dmitasro ba timoyotho du athrayda udu camayda.  

HNB mırle; “u Huyodo da Neşe d’Bethnahrin mşatasle şutose la neşe b’Urifi, Suriya, Turabdin ubu Iraq u mtakasle neşe l’darğe u wolyotho mşahılfotho dmıdde duktho bu haqlo diplomatiqoyo, folitiqoyo, bu tbocofroso, bu momuno uğer. Elo leşan di şawyutho udi kinutho dmihaqıqo, i athto mıdla zayno u mşatsi a Haylawotho du Sutoro da Neşe d’Bethnahrin. I athto du camaydan mıdla duktho ba gbine du qrobo u kımaydo wolyotho ba haqle di mşaynutho.”  

U Huyodo da Neşe d’Bethnahrin gıdsoyım i rişutho du camlo di athto, gıdmaqwe a neşe wa claymothe dhowın more d’sebyono, leşan dım’athli u camaydan beyn da came dı britho, dmitaqım jilat umthoye b’mafhum di şawyutho udi demoqratoyutho. Bebzabno gıdmathlina u camaydan ba platforme dı britho. Brekhşe di athto kımqadmina a şlome wa iqoraydan la neşe du camaydan u kımmina i athto Huboyo, Huyodoyo, Hayloyo u gıdmalxo li hirutho du camayda.  

Tihe Rishono d’MUB Mikhael Naim Hadodo 

Tihe Huyodo da Neşe d’Bethnahrin  

Athto Haye Hirutho