21/07/2020

Bi rmoyto dımqadmo kmibıc dmitaqbıl 24 Nisın u yowmo du Sayfo b’Lebnon

Menyono d’qoyume bu parlamento d’Lebnon, bi rmoyto dımqadamlın tlıblın dmibayın 24 bu yarho d’Nison kul şato, yawmo athronoyo dıkmitathkıri ebe a’sohde da n’Armınoye, da Suryoye-Othuroye dıqtili bu qtolğenso du Sayfo da na’1915 bu zabno di şultonutho Cuthmanoyto.

 Bi rmoytathe, a’qoyume Lebnonoye tlıblınste dmibayın u medano xıd fusqono ruşmoyo bi ytawto du parlamento dıbqamuthayna.

 Grub d’qoyume bu parlamento d’Lebnon dkıtne m’gabe Mşihoye mşahılfe, mdelın ruşmoyith cal rmoyto mşawtafto dıktılbo mu parlamento dımbayın 24 bu yarho d’Nison mkul şato yawmo athronoyo, laşan u duxrono da sohde Armınoye, Suryoye-Othuroye d’Lebnon dıqtiliwo bu qtolğenso du Sayfo i şato da na’1915, elo bi rmoytathe lıkmıtlıb dhowe u yawmano nyuhto ruşmoyto bu athro d’Lebnon.

Bi rmoytathe kmıtlıbste dmibayın u hergo qadmoyo dkulle ba madraşyotho, ba botaysefro uba botaysawbo, laşan dmitahwe mawdconutho makthabzabnoyto calu mede dhawiwo bu qtolğenso du Sayfo, udmitanhıri a’yolufe calu qento di tuxmonoyutho udi frişutho, ucali ulsoyutho dmınfıq moro la zedqe noşoye.

A’qoyume Lebnonoye bi rmoytathe, mawdaclın da n’Armınoye, Suryoye-Othuroye dhawınwo nişo lu qtolğenso bu zabno du qrobo qamoyo dıbritho ubıthırste, kşowın ucdo dmibayanlın yawmo dmitathkıri ebe a’sohdathe, cal datre camani kımşakli ucdo falqo asasi mu kenşo Lebnonoyo, u grişıste u zuhoro calu kafno rabo dımhewole u Turo d’Lebnon bayn di şato da na’1915 uhuli şato da na’1918, udıqtılwo ebe ha ma tlotho sahme du camo Suryoyo Marunoyo awkith bayn 120 uhul 200 Alfo farsufe.

Bebzabno, u grub da qoyume Lebnonoye makadlınste di rmoytathe klozım dhuyo qonuno ruşmoyo, cal da n’Armınoye, Suryoye-Othuroye dxalsiwo mu qtolğenso du Sayfo mgalwewolın bıthır lu athro d’Lebnon, u hawın ucdo falqo dlıkmıfrış mu kenşo d’Lebnon, u grişıste u zuhoro calu parlamento d’Lebnon dmıctarafwole bu qtolğenso da n’Armınoye bu yarho d’İyor i şato da 2000.

U grub da qoyume Lebnonoye mahwelınste sabro dmitaqbılo i rmoytaththe xıd qonuno ruşmoyo bi ytawto dıbqamuthayna du parlamento.

Check Also

YPG maglela cali hiyoyutho da Sohde dmahrawla Turkiya wa marhıbonayda a bethqburathe b’Cafrin

Bi maqırhonutho dıfrıslın a Haylawotho du sutoro du Camo-YPG, maglelın cali hiyoyutho da S…