Bi Wiesbaden mtayib hfitutho lu tithkar da Sohde di cito da Rom Malkoye Orthodoksoye d’Mor Elias

WİESBADEN — A Mşihoye di golutho wu camaydan, kımdawmi dmahwın i awyuthathe cama dıbhe du furqoco qtolnafşoyo dsımwo 22 bu yarho dşafıcina bi cito d’Mor Elias bi şawtho di Dwelca b’Darımsuq d’Suriya. Athmıl’ste yawme d’Shabtho bi şoctho da 18.00, layimi hadome d’citotho uda gabe u şutose frişe du camaydan bu qentrun di mdito d’Wiesbaden u maqıthe şamce ubi idothaye luhyotho u slibe.

Ba mamle frişe dsimi me Reta Masoud, Moriel Thomas, İbrahim Kızılgöz, Sabri Alkan, Tony Bahho, Mina Ghattas kle cali hdoyutho du camaydan ba eşmonayde kulle u mathkıri a Sohde u mahwe i awyutho u snodo la yaqrothathe u b’qaşyutho krih u hçomo marhıbono dsımwo 22 bu yarho d’Hziron cala Mşihoye di Dwelca.

Bebzabno u masle’ste u ruğzo tuhmono qaşyo dkito mqabıl da qalilotho tawdithoye u etnikoye b’Suriya. Ba mamlani tlib dmisım u sutoro da Mşihoye uda qalilotho hrene uda dukothathe di slutho, dmihaşwi a hayobe da hçomani a marhıbone ubebzabno, dmınfıq mqabıl di fıtne udi bcelıdboboyutho dıkminase dmisomo bu athro. 

Camgabe da hfuxyani du camaydan di golutho u camaydan u Suryoyo Othuroyo Kaldoyo mtayabwole’ste taglıyotho bi arişkoyto d’Suriya-Darımsuq ubi mdito di Latqiye u tlıbwole dmıftıh buqore u dmımsoki a hayobe du furqoco marhıbono dsim bi cito. Me gabo hreno, ba mdinotho hrene d’Suriya’ste, sımwo slawotho cali ruho da Sohde u hadırlın fatıryarxe u rişone hrene tawdithoye cam came mşahılfe d’Suriya.