Bi zalzale dhawyo b’Myanmar u b’Thailand, mvayaclın hol alfo bnaynoşo a hayathe uhol 2200 hrene’ste mçarhi u lfuth u mede dıkmahwe

MYANMAR/THAILAND – Lfuth u tbocofroso d’Myanmar, b’2 zalzalat qawye dhawın athmıl bıthır me falge d’yawmo bu athro, mvayaclın hol alfo bnaynoşo a hayathe u 2300 hrene mçarhi-u hani belhude bi marcitho d’Mandalay d’Myanmar. A zalzalatani hawın bu tayman madınho d’Asia hızlın Thailand u 5 falohe du bnoyo da bote mcayaclın a hayathe uheş kito 117 hrene mvayce beyn da shifotho du bınyono celoyo d’30 taboqe shif aclaye b’Chatuchak.

A falohe di mcadronutho msarhabto’ste kımdawmi dkurxi beyn da shifotho leşan dımqafın farsufe ba haye. Gawonoyith mawdıc d’9 farsufe mvayaclın a hayathe b’Bangkok dıkhoye eba 17 milyone dıbnaynoşo. Lfuth i daira du geoloji d’Amerika, kito zuctho dhol 10 alfo bnaynoşo mvayaclın a hayathe b’Myanmar bu gunhano dhawi. İ bethkrihe di arişkoyto d’Myanmar’ste malyo farsufe dımçarhi ba zalzalatani.

Bebzabno i junta folhoyto d’Myanmar dıkmdabro ucdo u athro, tlıbla mcadronutho xıd darmone uğer sniqwotho ubi sbuthathe u Huyodo d’Urifi, Emwotho Mhaydotho u Fransa mawdace dkıtne hadire dımşadri mcadronutho li marcitho d’Mandalay b’Myanmar. İ zalzale qamayto matiwo u haylayda l’7.7 bi lohitho Emwothoyto da zalzalat u bıthır 8 qatinotho, hawi zalzale hreto dkıtwo u haylayda 6.4. Awkith, a 2 zalzalatani ğalabe qawye’wın u m’atharlın cal dukotho du Sin’ste.