07/04/2021

Biden kıtle mkono dmıstacmıl i meltho u qtolğenso da 1915

‘U rişono Joe Biden, kıtle bu yarhano mkono rabo dmıstacmıl i meltho du qtolğenso cala gunhe barbroye dsımwola i mamlaxtho da Cuthmanoye calu camo Armınoyo’ a melani di mdabronutho di sfaryawmo Amerikoyto d’The Los Angeles Times’ne.

İ mdabronutho di sfaryawmo bi mimartho dfrısla kımawdıco, dhınne xıd mdabronutho fsıqla dımbayno i klaytayda bi sbuthathe du qtolğenso dsim calan Armınoye ban 1915.

A rişkothube wi mdabronutho di sfaryawmo d’The Los Angeles Times m’akade dkubci du rişono Amerikoyo Joe Biden, dmawde bu yarhano d’Nison bu qtolğenso dsımwola i mamlaxtho da Cuthmanoye calu camo Armınoyo bu zabno du qrobo qamoyo dbritho. Calathe i mdabronutho di sfaryawmo kımawdıco; U rişono Biden kıtle bu yarhano gado rabo, dmıstacmıl i meltho şarırto dcala gunhani dsimiwo ban 1915 calan Armınoye.

İ sfaryawmo kımmo; Bu zabnano dkıtyo u yawmo şatonoyo du şuroyo du qtolğenso, kibe-u klozım’ste Biden dmahıt ışme da gunhanık-qtolğenso. Meltho dmıstacmılo holucdo me belhude ha rişono d’Amerika-Ronald Reagan. İ sbuthathe latyo sbutho lu droşo-hano gunho mqabıl di noşutho’we u kull dkothe’ste, a şultonwotho d’athrawotho frişe dbritho kımawdın ebe u kımathkırile kull şato 24 bu yarhano d’Nison. Lıklozım dmitahwe duktho lani dıkmankıri u qtolğensano-bi rişonuthathe i şultonutho d’Turkiya.

İmdabronutho Los Angeles Times mırla; U tenkiro du qtolğensano dsim mi mamlaxtho da Cuthamnoye-kışobıh lu tenkiro du Holucaust dsımlın a Nazie leşan u qşoco da Yudoye’yo. Noşo lıkmankır u qatlo da Yudoye u hawxa’ste lıklozım dmitankır u qtolğensano dan Armınoye. İ hawrutho dkıtla Amerika adyawma cam Turkiya, lıkowe dım’athır calu fusqono du Qusro Heworo u klozım’ste dmahto klayto mqabıl Ankara cala hçome dıksaymo bu garbyo d’Suriya cala hayle muttafik d’Amerika u mqabıl dan Armınoye b’Qarabax. Obama u Trump’ste kıtwolın gado dmawdın bu qtolğensano, elo lo mıstacmewolın-u calathe klozım Biden ucdo, dmıstafıd mu mkonano u makthabzabnoyo dkito adyawma.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…