Biden klozım dmakle u tukoso marhıbono d’Dacış meqım mıd dımkamıl u qtolğenso dmabdewole cala Suryoye u cala Ezidoye

‘Biden klozım dmakle u tukoso marhıbono d’Dacış, meqım mıd dımkamıl u qtolğenso dmabdewole cala Suryoye Othuroye u cala Ezidoye’ a melani di mimartho dıfriso bıdafe frişe du nawlo, cali ulsoyutho di ithutho d’Amerika bu Iraq.

İ mimarthathe’ste kthiwo mşawtıfo me Juliana Taimoorazy dkıtyo mu camaydan, u rabi da Yudoye Abraham Cooper u mşalo da Ezidoye b’Amerika Hadi Pir. Me gabo hreno i dafo d’News Week’ste grışla u zuhoro cali aykanoyutho da Mşihoye uda Ezidoye bu Iraq.

 Taimoorazy, Cooper u Pir, frıslın i mimarthathe bu zabno d’Amerika mkamela u groşo da folhayda bıthır 20 d’ithutho b’Afğanistan wu qento dkito ucdo, dmıxlıq kriz noşoyo bu athro mu qedomo qaşyo dkıtte a Talibanoye. U kriz noşoyano, hawiwo bu Iraqste ba 2011 bu zabno dfsıqwola Amerika dmıgroşo mu athro.

U bıthır kmo eşne’ste, kbışwolın a ğrobe marhıbone d’Dacış u Iraq u Suriya ubi netiçe hzewolın dilonoyith a qalilotho tawdithoye husrono rabo mu tukosano. Bi mimarthathe bşıkıl rwiho griş u zuhoro calu camaydan ucala Ezidoye dkıtne came şerşoye du athro dbeyn da 2 nahre-Deqlath u Froth u aydarbo sımwole Dacış qtolğenso barbroyo aclaye bnişo dqoşace mu athro dan abohothathe u bıthır i golutho rabtho dhawyo mu Iraq ume Suriya.

Calathe bi mimartho tlib mu rişono Amerikoyo Joe Biden, dlo soyım cayni mede bu Iraq xıdu mede dsımle b’Afğanistan u dtore a qalilothani cali idaye u fothaye. Bebzabo bu taşroro dfrısla i mğaltho Amerikoyto d’News Week, mawdacla da Mşihoye uda Ezidoye d’daciri la fenyothaththe bi daşto d’Ninwe ub’Şigur u dımşarelın haye hathe, kıtlın ucdo zuctho dothe b’rişaye u xıdu dkowe ucdo b’Afğanistan bıthır mu groşo Amerika.

U taşrorano mawdıc di methcadronutho beyn da Talibanoye ud’Alqacida mawladla Dacış wu nfolo d’Afğanistan, xlıqle zuctho beyn da Mşihoye u Ezidoye cal dkito ğamo dhowın naqla hreto nişo lu tukoso marhıbono d’Dacış. Stefan dkıtyo mu camaydan d’daciri l’Bağdede, mırle l’Newsweek; Dothe dmıhçım aclayna naqla hreto me Dacış, i naqlayo gıdhuyo i harayto di şkihuthaydan bu Ciraq. Wu nfoqo da hayle Amerikoye mu athro gıdxolıq elayna qetro rabo. NewsWeek ba melani hthımla u taşrorayda; A alternative kulle bidothe d’Pentagon, di wazirutho di baroyutho udu Qusro Heworo’ne, leşan a Mşihoye wa Ezidoye sbutho d’haye ya d’mawto’yo dlo cayşi haşe hathe xıdu dkowe ucdo b’Kabul.