25/04/2021

Biden lo mamtele bahıs dğer came dı mafiti mu qtolğenso

Bu yawmo şatonoyo du duxrono du Sayfo da Armnoye dkıtyo 24 Nisin u rişono d’Amerika Joe Biden bu mamlo dsımle mırle; U qatlo dhawi bi şato da 1915 huli şato da 1923 qtolğensoyo.

Elo bu mamleyde dsımle bıkthawto lı mamtele bahıs da came hrene mşihoye dı mafito mu sayfo bu zabnawo mathlo u camo suryoyo othuroyo.

Bıthır mu sayfo dhawi bi şato da 1915 u camo Armnoyo mdawamle bu ağuno dhule mqabıl da sayome du Sayfo mqabıl di zihniye cuthmanoyto mathlo lu medano ba 7 u ba tmoniyat mabdewolın hcome cala rğşayizgadwotho d’Turkiya ba athrawotho mşahılfe u be bzabno markawlın sicotho du lobi u du diplomasi laşan dıbritho mawdyo bu qtolğınzano dhawi aclaye.

Bi netice da fulhone dsımlın A armnoye matın l’darğo dkul ha Armnoye kmawde bu qtolğınso u bu yawmo dımbayanlın kmahwe u hfuxyeyde bu şıkıl dıg qodır , u hawxa ğalabe athrawotho mawdelın bu qtolğızathe u athmıl u rişono d’Amerika mırle hawi qtılğınzo calu camo Armnoyo.

Elo bu mamlo dsımle u rişono Amerikouyo lı mamtele bahız da came hrene dhawın qurbono bu qtolğnsano dkıtwe cala mşihoye kule dı hoyınwo ba thume di mamlağto cuthmanoyto. Ha ma camani ste u camo Suryoyo othuroyoyo dkıtyo u camo Şırşoyo du athrawo dlı mamte bahız dide. U camo Suryoyo Othuroyo dhawi dıbho du Sayfano dmahkele Biden acle ba tışciyat mşarele dmacle qole u dsoyım lobi lu sayfo dhawi acle.

Bgawe du ağuno dkobe u camo Suryoyo mi dişutho dhawi acle u mi trawma dmafıtle heş lı mati lu darğo dsoyım u yawmo du Sayfo yawmo dilonoyo u dmahwe hfuxyo u dmahkele lkul noşe mawxa ste khozina a athrawotho dmawdelın bu sayfo du cameydan heş latne bu mınyono dmadelın bd Armnoye u be bzabno u rişono d’Amerika Biden lo mathkarle u ışmo du cameydan walaw ahna w Armnoye cam hdode u me cayni hayli qtilina.

Bel kmitamte bahız du qtolcameydan bhın ma hiğmonwotho d’Amerika u kfoyıt bi rmoyto dımqadmole u Sentor Bob Menendez lu rişon Biden dmawde ebe, u be bzabno kfoyıt u ışmo du cameydan ba maqırhonwotho da şutose d’Amerika u dhın ma athrawotho hrene elo heş latyo makıfyono.

Laşan dmitawde bu Sayfo du cameydan klozım bi qamayto kul farsufo mu cameydan dmaqbıl u yawmo du sayfeydan u dmaşmıc u sayfo bu yawmano lkulman dıg loqe, u be bzabno dmiqadım egartho mhayathto l’Amerika me feme du camo Suryoyo othuroyoyo Kaldoyo oromoyo dıg tolıb mawdyonutho kamılto bu Sayfo.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…