26/02/2021

Biden malele cala şwole qlimoye camu malko di Scudiye Bin Salman

U rişono d’Amerika Joe Biden, hawile athmıl mamlo bu telefon camu malko di Scudiye bin Salman u kle cal şwole qlimoye u Emwothoye dkıtte asirutho cami sbutho di mşaynutho b’britho.

 Bebzabno u Qusro Heworo adyawma maglele, dlıkfursi u taşroro dımtayıb calu qatlo du gelyunoro Jamal Xaşıqçi. Athmıl mawdacwo du taşrorano gıdmıfrıs ruşmoyith lu tbocofroso.

Bi maqırhonutho dfriso adyawma mu Qusro Heworo m’akıd, du rişono Joe Biden hawile athmıl mamlo bu telefon camu malko di Scudiye bin Salman. Bu mamlano dmawdıc şafıc towo, Biden wu malko kalın cal şwole frişe; beynothaye i sbutho du taşroro dcalu qatlo du gelyunoro Jamal Xaşıqçi ba 2018.

U Amiro Mohammad bin Salman, dbu praktik dkıtyo huwe dıkmdabır adyawma i Scudiye, thim ğalabe naqlat dhuwe farsufoyith, huwle u amro du qatlo du gelyunorano. U taşrorano dımtayabla Amerika dıkm’akdo ebe du Amiro kıtocın i mşalutho du qatlo du gelyunoro, mawdacwo athmıl dgımıfrıs ruşmoyith.

Elo lfuth CNN, u Qusro Heworo mawdacle, dlıkobıc dforıs ucdo u taşrorano-hol d’Biden dlo mıjğıl camu malko Salman. U mamlo sim camu malko-elo heş lo fris u taşrorano xıdu mede dmawdacwo. Bi maqırhonutho du Qusro Heworo mathkır, d’Biden u bin Salman drışlın i sbutho du qrobo d’Yemen wu dawro d’Amerika bu sutoro di Scudiye mqabıl da hçome du İran-elo u Qusro Heworo lo mawdacle mede calu qatlo du gelyunoro u loste calu taşroro dgımıras’wo.

Cıl mu taşrorano’ste, kmıntır adyawma dmitaqıblo rmoyto hathto b’Woşington, leşan dmitahwıyo i mşalutho du qatlo du gelyunoro uda dyoşe hrene dıksaymo i Scudiye cala zedqe noşoye. A droşani dcal Xaşıqçi udi Scudiye’ste kmifaşqi ma yadıcthone, xıd klayto me Amerika mqabıl da dyoşe da zedqe noşoye udu tlobo du hşowo me Riyad bi sbuthathe. Biden heş me meqım, grışwole u snodathe mi Scudiye bi sbutho du qrobo mqabıl d’Yemen.

Check Also

USAİD kımdawım d’sonıd u maşıqlo du bnoyo u du hethotho di daşto d’Ninwe

U tukoso Amerikoyo du quyomo Emwothoyo-USAİD, kımdawım d’sonıd u maşıqlo du bnoyo u du het…