12/03/2021

Biden mdele tahte di paketa dımbayno la tedbire mqabıl du virus di Corona

U rişono d’Amerika Joe Biden, mdele athmıl cali paketa dımbayno lu snodo da bnaymothoye du athro mqabıl du virus di Corona. İ paketathe dıkmişaklo me 1.9 trilyone dolare, mdele Biden acla bıthır mıd maqbılo bi kongre.

 Lfuth u plan dkıtla i mdabronutho d’Biden, holu yarho d’İyor klozım dmiqadım vaksin la bnaymothoye dkıtne rabe bu cımro u bebzabno, mawdıc dhol 4 Tamuz klozım naqla hreto ducri a haye kyonoye b’Amerika.

U rişono Amerikoyo Joe Biden, mdele athmıl tahte di paketa dımbayno la tedbire mqabıl du virus di Corona dıkmote u timayda l’1.9 trilyone dolare. Bıthır mıd fayito ucdo i paketathe xıd qonuno, gıdmiqadım 1.400 dolare xıd mcadronutho momunoyto la bnaymothoye dım’athri mu pandemi di Corona, u gıdmiqadım’ste 350 milyare dolare la mdabronwotho da marcıyotho, u leşan a fulhone du tehwiyo du vaksin uğer.

İ paketathe d’Biden’ste hdo ma şudoye dhuwole bu zabno di kampanyayde ubu şıkılano, hiw sabro hatho lu camo elo Biden mkararle’ste, du camo klozım dımdawım dmoyıd a tedbirayde mqabıl du virusano, hawi celtho lu mawto dhol 530 alfo Amerikoye. U mınyonano da mithe’ste, kmiqayıs camu mınyono da Amerikoye dqtiliwo bu zabno du qrobo II dbritho.

Belhude 10 ba mo da Amerikoye qayıthlın a mhate kulle du vaksin. Biden mbayanle’ste 1 İyor, xıd yawmo di şaryutho mu virus wu 4 Tamuz’ste xıd nişo, d’ducro Amerika la hayayda a kyonoye. Bu şıkılano ucdo gıdmitaşe fulhone leşan dmitahwe u vaksin la bnaynoşo kulle dkıtne rabe bu cımro b’Amerika, la folhe, la yolufe, la osye ula falohe da haqle frişe du kenşo.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…