25/04/2021

Biden mıstacmele i meltho du qtolğenso rışmoyith calu Sayfo da 1915

U rişono Amerikoyo mıstacmele athmıl ruşmoyith i meltho du qtolğenso, cala hawbe noşoye dsımwola i mamlaxtho da Cuthmanoye  calu camo Armınoyo bu duxrono şatonoyo du qtolğensano.

Bu tebano, abıcina dfırşinale lu mamlo dsımwole athmıl Biden bu Qusro Heworo bu duxrono da 106 eşne du qtolğenso dan Armınoye.

U rişono Amerikoyo Joe Biden bi maqırhonuthayde mırle; Kull şato bu yawmano, kımathkrına a haye dani dmayithiwo bu zabno du qtolğenso dsımwo calan Armınoye bi mamlaxtho Cuthmanoyto u kımamtena lbolayna, dıklozım dmaklena a hawbani leşan dlo mikarıri naqla hreto. Bu şuroyo d’24 Nison dan 1915, bu msoko dan Armınoye nahire u mşale mdinoye b’Kostantinofolıs, bi kampnya da mşale di mamlaxtho Cuthmanoyto, qtiwolın u jbırwolın hol milyon u falge d’Armınoye l’halxo lafu mawto bnişo dquşcolın. Kımathkrina a dıbhe d’Meds Yeghern, leşan dlo mivayci bu makthabzabno. Kımathkrina hani dcayşi u dımgalwewolın lğer athrawotho frişe-acmaye l’Amerika. B’haylo u b’delqublo qadiri an Armınoye dcayşi u dbonın u kenşathe me hatho. Hani dore, trelın an Armınoye d’Amerika dhuwyo catırto elo lo tacın u makthabzabno mahişono d’jbırwole u camano lu athraydan. Kımyaqrina i teşcithathe, kıhozina u haşathe u kımathkırina u medano-lo leşan d’tuhmina, elo leşan dım’akdina d’naqla hreto dlo mikarır u haşano. Adyawma kımathkrina u mede dımvayıc elo klozım’ste dhayrina lafu dactith u dbonina britho hatho la nacimaydan-britho dkiba tolerans u dımyaqro a zedqe noşoye, u dkull camo kibe dcoyış b’neshono u mşaynutho. Camhıdode kiban dkolina mqabıl da hawbani leşan dlo mikarıri b’britho u dmanihina a jurhaydan bi awyutho ubu şbuqyo. U camo d’Amerika kımyaqır an Armınoye dqtiliwo bu qtolğenso meqım 106 eşne.

Me gabo hreno cali mawdyonuthathe du rişono Amerikoyo, u rişwazire Nikol Paşinyan wu rişqutno Armen Sarkisyan mqadamlın a tahınyothathe l’Biden cal dmıstacmele i meltho du qtolğenso u Paşinyan mırle; An Armınoye dbritho kula, matilın u tebo basimo ubı fsihutho mıstaqbelın dmawdalxu ruşmoyith bu qtolğenso dsim calu camaydan man 1915 uholan 1923.

Armen Sarkisyan’ste mırle; İ mawdyonuthathxu bu qtolğenso, remzo d’çasara rabtho’yo u gıdm’athro cal ğer athrawotho hrene’ste. Wu kıtla i mawdyonuthathe ulsoyutho rabtho lan Armınoye ula bnaynoşo kulle d’britho dıktulbi i kinutho. İ mawdyonuthathe, gıdfutho’ste fotho hatho ba esore beyn da tre athrawotho. Bu mamlayde Biden, lo mathkarle ışme du camaydan u Suryoyo Othuroyo udu camo Pontusoyo dmafitiwo bcayni qtolğenso barbroyo elo naqla hreto kıfotıh darbo l’gado rabo dmitawde bu dactith bu qtolğenso dsim aclaynaste.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…