Bıthır mıd u rişwazire Friedrich Merz yimele li wolithaythe b’Berlin d’Almanya, mabdele u rişwazire şişaltho d’socurwotho l’athrawotho frişe d’Urifi

ALMANYA / URIFI – Bıthır mu quwolo haroyo dsim bu parlamento d’Almanya u dmıdle Friedrich Merz qole makfıyone leşan dmoyıd dukthe xıd rişwazire du athro, mabdele ucdo socurwotho l’Fransa u Polonia. Hathe’ste kımadilo, d’Almanya gıdmazido u zawco d’Almanya ba şwole baroye udu Huyodo d’Urifi.

Xıd remzo du medano, Merz şafıc l’Paris u hawile ytawto camu rişqutno Emmanuel Macron u drışlın aydarbo Almanya u Fransa kibın tawtır dmaqwın i methcadronuthathe bhaqle frişe. Bu tarano a 2 rişone matın l’awyutho dımbayni Mawtbo mşawtıfo du sutoro udi mşaynutho. Mawdıc di methcadronuthathe’ste kiba dobo surca la fulhone du Huyodo d’Urifi kule.

Bebzabno a 2 rişone drışlın a şuşote haroye du qrobo d’Ukraina uğer sebwotho qlimoye u Emwothoye. Bıthır mi ytawto dhawyo b’Paris, şafıc u rişwazire Almanoyo l’Warşaw d’Polonia u laqi u bar’amnayde Donald Tusk. Ba droşani u rişwazire Merz huwle şudoyo l’Tusk, dgımaydi li ido i sbutho da galwoye lo qonunoye dkothın lu qlimo.

Ba droşani’ste a 2 rişone kalın cali ulsoyutho du duyoqo di mşaynutho da thume dan athrawotho Urifoye. Merz m’akadle d’Almanya gıdmaydo duktho bu inisyativ dmıdla Hollanda, Danmark u İtalya leşan dmitaqşın a thume wi siyase di golutho. Bi sbuthathe Merz mırle; İ şultonuthayde gıdmıştawtıfo lu inisyativano u camhıdode gıdmaydina fusqono bi sbuthathe. Kıhoyina adyawma b’britho, dıklozım camhıdode dobina funoyo la qetre dkito.