Bıthır mu zuhoro dsim Turkiya grışla ruha mu yamo mescoyo

Turkiya kımdawmo dımşadro marıhbone u jatawiye nuxroye lu athro d’Libya u d’Azerbeyjan.

 İ mawdconuthathe hiwo ma tıre wazire di baroyutho d’Mısır u d’Armenya bu knuşyo mşawtıfo dsim lu tboco froso bi mditho d’Alqahira.

 Athmıl u waziro di baroyutho d’Mısır Sameh Şukri bıthır mi ytawto dhawile camu baramnayde d’Armenya Zohrab Manatsakanyan, sımle knuşyo mşawtıfo lu tboco froso bi mditho d’Alqahira.

Şukri bu mamlo dsımle, mawdacle dı Turkiya kımaşyo siyase du terwiho di şultonuthayda bu qlimo du madınho, u makadle di siyasathe kımharhızo i şalyutho b’gawıd du qlimo.

Calu şuwolo d’ida Turkiya kımaydo dhowe şalyuthzayno b’Libya bi rocyutho d’Emwotho Mhaydotho aw lo, u waziro di baroyutho d’Mısır mırle “a maqırhınwotho dı Turkiya ida dlımitafiti la haye latlın ulsoyutho. Hul ucdo kit man dkımşadır mharbone nuxroye u tukose marıhbone lu athro d’Libya”.

Bebzabno, Şukri makadle di şultonuthayde ksındo kul şıkıl d’fulhone dıkşorın u kriz d’Libya, u ba melani mdawamle “Mısır snıdla u diyalog dımtayıb bayn da tıre hayle d’Libya bu athro d’Mağrıb. Bi sbutho d’Libya ahna masrena bu şroyo folitiqoyo dkowe bi mtaltho d’Emwotho Mhaydotho. Kımakdinaste i hdoyutho da narcotho d’Libya wu iqoro da fusqone emwothoye”.

Megabo hreno, u waziro di baroyutho d’Armenya bu mamlo dsımle, mawdacle dı Turkiya knıqlo mharbone nuxroye lu athro d’Azerbeyjan.

Bi netije du hboso emwothoyo, dilonoyith u Huyodo d’Urifi dımzaharle Anqara dgıdmahıt tedbire momunoye mqabıl dida, ida dothe dımdawmo ba fulhone du kroxayda dcalu nafto bu madınho du yamo Mescoyo, athmıl Turkiya madcarla i sfitho du kroxo dcalu nafto “Orok Res” lu lmino d’Antalya bu tayımno dı Turkiya.