Bıthır u tboco froso du cameydan dhule tebe Rusya’ste thımla Turkiya ba duyoşe dıkseymo

Bıthır me zabno d’Suroyo tv u wu frosqolo du cameydan Suroyofm kfırsi tebe cala dyoşe u barbroyutho dıkseymi a marıhbone dkıtne masre b’Turkiya ucdo Rusyaste mzaharla Turkiya bi sbuthathe.

 Be bzabno u hadomo du mawtbo di rişonutho di PYD Aldar Xalilste bi maqırhonutho dhule lu tboco fros grışle u zuhoro cala dyoşe u xırbote dkıbco saymo Turkiya beyn da athrawotho Caraboye.

Hani zabno yarixo Suroyo tv u SuroyoFM wu tboco froso di Gozarto, kmawdıci la hazoye ula qaroye u şamoce, cala dyoşe, cala htofe, tehriwo u hbose dıkmisomi cala came dıkhoyın ba dukothe dkıbişila Turkiya bgawe da thume d’Suriya.

Bıthır ma tebani, ucdo Rusyaste mawdacla dı grışla u zuhoro d’Turkiya dmaydo i mşalutho dkıtla cala grube marhıbone dkıtla b’Suriya. U rişono di nuqazto di awyutho d’Rusya b’Suriya Alexander Şarbetski bi maqırhonutho dhule mırle; Ba hjome dıkmisomi uba taxtuşe da grube dıksundi Turkiya b’Suriya, kowe qatlo da mdinoye u dyoşo da zedqe u htofe dfarsufe. Mawxa Turkiya klozım dmaydo i mşaluthayda cala grubani dıksundolın.

Bıthır mıd kobe mathle cala dyoşe u gnowe da grube marıhbone d’Turkiya, ksoyım qrayto lu gayso Turkoyo dmoyıd tedbire mqabıl da grubani b’Suriya. Me gabo hreno u hadomo du Mawtbo di rişonutho d’PYD Aldar Xalil bi maqırhonutho dhule li sfaryawmo Caraboyto mırle; Turkiya kımdaxlo ban athrawotho du qlimo kulle, leşan dımxarbıto u ftakar dan athrawotho Caraboye.

Bebzabno b’Suriyaste kıbco dmahto fıtne beyn da came dımşataslın Mdabronutho, dkıtyo mşakalto ma came di duktho. Mawxa ksoyım qrayto lu ray dıbritho dmahıt klayto qum da dyoşani dıksaymo Turkiya.