Bob Menendez krıhle a fulhone lo qonunoye du kroxo dcalu ğaz dıkmaşyo Turkiya bu madınho du yamo Mescoyo

U rişono di sictho da esore baroye di kongre d’Amerika senator Bob Menendez, krıhle a fulhone lo qonunoye du kroxo dcalu ğaz dıkmaşyo Turkiya bu madınho du yamo Mescoyo.

Senator Menendez dkıtyo mu gabo Demoqratoyo, bi maqırhonutho dfrısle bi dafayde mawdacle da fulhone dıksaymo Turkiya, kıdayşi i morutho di fnitho momunoyto dilonoyto d’Qufrus.

U senator Amerikoyo Bob Menendez bi maqırhonutho dfrısle bi dafayde du Tiwter, maglele d’Turkiya kımdawmo heş dıdayşo u qonuno Emwothoyo bu darbo da fulhone lo qonunoye du kroxo dcalu ğaz bu madınho du yamo Mescoyo. Menendez mırle; Turkiya kfulho naqla hreto leşan dmaciqo i şalyutho bu madınho du yamo Mescoyo. Turkiya kıdayşo i morutho di fnitho momunoyto dilonoyto d’Qufrus.

Bebzabno, Menendez mawdacle dıklozım Amerika dkulyo cam d’Qufrus, uklozım ste u Huyodo d’Urifi dsonıd a yuthrone du athrano dkıtyo ha ma hadome du Huyodo. Meqım mathe’ste, u malolo di wazirutho di baroyutho d’Qufrus Dimetris Samuel mawdacwole da provokasyone d’Turkiya awkith u hurhoşayda dacır naqla hreto l’Nikosia bu madınho du yamo Mescoyo. Samuel mırwole;Turkiya ksaymo mudaxala u knıfqo mqabıl di tarmitho du madınho Mescoyo bu kroxo dcalu ğaz wu tewfiqayde. Klozım Ankara dımyaqro u qonuno Emwothoyo.

Cali sbutho du dactid da 2 falqe di Gozarto d’Qufrus, Samuel mırle; Bı qrihutho tlıblan dmisım şroyo federaloyo lu kriz d’Qufrus, elo Turkiya krıfdo u şroyano u kıbco şroyo banyo cal 2 athrawotho, wu medano mqabıl da fusqone d’Emwotho Mhaydothoyo.