Boğdod u qlimo d’Kurdistan hawilın duroşe cala ğuboye

U rişono du parlamento du Iraq Muhammad Alhalbusi bi socurutho dsımle li mditho d’Arbil, yatuw camu rişono dmeqım du qlimo d’Kurdistan Mascud Barzani.

Bi ytawtathe, atre gabe makadlın i ulsoyutho dmışrın a qetre bayn d’Boğdod u d’Arbil, u bu zoyudo dkule kalın cala hıdriyat wa sniqwotho dkito la guboye gawonoye dıbqamuthayna.

Athmıl u rişono du parlamento du Iraq Muhammad Alhalbusi, sımle socurutho li mditho d’Arbil u laqi arişone du qlimo d’Kurdistan. Ba ytawyotho dhawile Alhalbusi drışle u qonuno da guboye gawonoye du parlamento dilonoyith u mluo da 15 dkıtyo masro camu menyono da dairat da guboye.

Alhalbusi bi ytawto dhawile camu rişono dmeqım du qlimo d’Kurdistan Mascud Barzani, drişi a şuşote folitiqoye haroye du Iraq, u makıd dıklozım dmişalıt u qonuno wi morutho di şultonutho cala bnaymothoye du athro, u dmibayni aşartat dıkşowın laşan dmisım guboye hire dkımgaşmi u sebyono du camo Iraqoyo.

Bebzabno, bi ytawtathe driş u qonuno da guboye du parlamento du Iraq wa dayirat da guboye dkıtne masre camu qonuno, u grişıste u zuhoro cal menyono ma şuhlofe dıklozım dmitafiti mu nomuso esonoyo bu maşıqlo dıbqamuthayna, baynothaye u şuhlofo du qonuno du bethdino celoyo du Iraq.

Cali sbutho du diyalog bayn da şultınwotho d’Boğdod u d’Arbil, Alhalbusi u Barzani makadlın i ulsoyutho dmihaydi ahzayotho bayn da hayle folitiqoye u dmaydi imşalutho dıknıflo aclaye, bnişo dmışrın a qetre bayn da tarte şultonwotho. Alhalbusi u Barzani makadlınste dımdawım u diyalog bayn Boğdod u Arbil, bnişo dmışrın a qetre dkito baynothaye bu taro du nomuso esonoyo du Iraq.

U parlamento du Iraq mdewole bi harayto di şato dşaficina da 2019, calu qonuno calu şıkıl haroyo du qonuno da guboye, elo u mluo da 15 mu qonunano lımdewole acla u parlamento, u fayişo qetro dlışre hul ucdo bayn da gabe folitiqoye du Iraq.