Britanya gıdmadcıro luho da şımroye lu Iraq

Bu athro dı Britanya, mqafe luho makthabzabnoyo dıkdocır lu doro da nabohothaydan a Şımroye.

 U luhano dkıtyo cımre hedor d’4 alfo ışne, gıdmitaslım calqariwo lu athro du Iraq.

 İ bethcatiqutho d’Britiş Muziyom, mawdacle dımcadarle a’pwelıs Britanoye bu tewdico di hiyoyutho d’luho da Şımroye dıgnew mu athro du Iraq u dıkdocır u makthabzabnayde l’4 alfo ışne.

Bu buyono dıfrısla i bethcatiqutho Britanoyto, mawdacla d’hawxa luhe ğalabe noqusene, u balhude 50 falqe kito adyawma menaye dımqafın b’nuqazyotho makthabzabnoye da mdinotho da nabohaydan a’Şımroye bu Iraq u b’Suriya.

U luhano dımqafe mahıtwo lu zebono bu darbo du nawlo i şato da 2019, u mawdacwo i naqlayo dkıtyo syomo Akadoyo mi qıtca d’Asya i mescoyto. U mawxaste cal du şerşayde latwe qriho, apwelıs Britanoye hawiwolın keşlo şek u tlıblın i methcadronutho du gloho Britanoyo laşan dmibayno i hiyoyutho du luhano wu şerşayde.

U luhano dkıtyo hfiro b’qatoro d’kalşo, kımgaşım surto d’farsufo dıklowış a’lbuşye cyodoye da Şımroye, u kımmathıl falqo m’luho du şuro dıkdocır u makthabzabnayde l’2400 ışne meqım mu mawlodo d’Mşiho.

Lfuth ambahnone, u şıkıl dilonoyo du luhano kdome la nathare dkito bu tayımno du Iraq, u mawdaclın da nathare du yuqdono dkito acle kımakdi dkıtyo mi nuqazto makthabzabnoyto dı Tıllo dımşatsowa eba i mditho Şımroyto d’Ğirso dımqafe eba syome d’kito aclaye athare du yuqdono. İ nuqaztathe hawyowa nişo l’tenhibo rabo bi harayto du doro da 19, ubu zabno du qrobo du Xaliç u du Iraq i şato da 2003.

Camgabıd du luhano dgıdmitadcır lu Iraq, i bethcatiqutho Britanoyto mawdacla dhul ucdo mcadarla bu tedciro d’zıd me 2300 falqe dathare gniwe li şultonutho d’Boğdod.