Bu buyono dıfrısle u Mawtbo di Athto mawdacle d’Turkiya kmaydo a neşe rişone folitiqoye u hfite nişo la hçomayda

U Mawtbo di Athto du gabo d’Dactid d’Suriya, krıhle a hawbe dıksoyım u gayso kaboşo d’Turkiya cala neşe hfite dkıtte mşalutho b’Suriya.

Bu buyono dfrısle u Mawtbo di Athto, mawdacle d’Turkiya kmaydo a neşe rişone, folitiqoye u hfite nişo la hçomayda, bnişo dmidış u sebyono di athto hirto wu ağuno dkobo leşan di hiruthayda.

Grub d’hadome du Mawtbo di Athto d’MSD, layım athmıl qum du benyono du gabo bi mdito d’Raqqa, u frıslın buyono mqabıl da hawbe dıksaymo Turkiya cala neşe-bi qadmoyuthathe u qatlo di hadımto d’HDP bi mdito d’İzmir Deniz Poyraz.

Bu buyono dıqre mi malılto du Mawtbo-Ğaliya Alkajwan, kmıgrış u zuhoro calu gayso Turkoyo dheş mu şuroyo du kriz d’Suriya uhulucdo, kımaşe siyase mtakasto da hçome u kmoyıd nişo a neşe da fenyotho kbişe du garbiyo udu madınho d’Suriya, u ksoyım gunhe mqabıl-xıd qatlo, teçawız u golutho dlatyo bu sebyono, bnişo dmıtwır u haylo da neşe bıthır ma dawsat dımhalaqla bu haqlo folitiqoyo, folhoyo, momunoyo u kenşoyo.

Bebzabno mawdıc’ste d’Turkiya latla thumo bi sbutho da gunhe dıksaymo cala neşe, u mawxa’ste fayış kmaydo nişo neşe dkıtne rişone folitiqoye, beynothaye i notrathrozo gawonoyto du gabo du Dactid d’Suriya-Havrin Xalaf d’qtilowa 12 bu yarho d’Teşrın u Qamoyo da 2019 cal dkobowa ağuno leşan di ahonutho da came udi hdoyutho d’Suriya.

17 bu yarhano qtilowa i hadımto di HDP Deniz Poyraz ba buğre dmarıswo acla bu makıthbo du gabo b’İzmir. U buyono mawdacle’ste da hçome dıkmisomi me Turkiya cala neşe, u nişathe dmıtwır u sebyono di athto hirto wu ağuno dkobo leşan di şawyutho, i hirutho wi ahonutho beyn da acme.

Camgabıdathe, u buyono maglele d’Turkiya wa marhıbonayda b’şıkıl barbroyo dlo axlaq kmaydi nişo i athto dkıtyo nahırto u mtakasto ba fenyotho kbişe bu garbiyo ubu madınho d’Suriya. calathe, u buyono sımle qroyto la tukose Emwothoye da neşe uda zedqe noşoye dmahti ido bido, mqabıl da hçome dıksaymo Turkiya cali athto, u dmiqadmi a hayobe lu bethdino.