Bu calway “u cedo d’Ha Nison Akitu i mardutho di hdoyutho umthoytaydanyo”, MUB frısle buyono dımhanele ebe u camaydan bi cohnutho di rişıdşato umthoyto Bıbloyto Othuroyto Oromoyto Suryoyto d’Akitu

U Mawtbo Umthoyo d’Bethnahrin bu buyono dıfrısle adyawma mawdacle du ağuno di hirutho dıkmitahwe bi rişonutho d’MUB, kmısnıd lu maktabzabno di şato da 6775 du cedo d’Ha Nison Akitu, u mathkarle ste d’Akitu xıd ha ma cede qamoye di noşutho, sbartho di cyeşe hathto u du mathyo du rbico’yo. A’mdinotho, a wahde wa haqle bu nushono di hirutho mi zayniwo, u kul farsufo’ste bu tacbo dobewo coyaşwo i tubthonoyutho di mathlonutho di hiyoyuthayde u di mawhabtho dkıtwole.  

Bu buyonayde MUB mırle:

“Mu ceyodo fşito u hol la zawhe mqalse, u cedo d’Ha Nison Akitu dıkhobaşwo u Madenho Mescoyo kule, cama mdinoywotho d’Bethnahrin qawi u hawi cyodonoyo. İ diloyto mşawtafto du ceyodo da yawmani dkıtwın a malke, a remze felethonoye awkith mitolojik wa bnaynoşe kulle bcayni zedqe şawye, cal dmıtyaqniwo lu hethothowe. U cedo d’Ha Nison Akitu laşan du camaydan u Suryoyo-Othuroyo-Kaldoyo-Oromoyo, xıd maktabzabno nubco di cyeşeyo. Ağro mşawtıfo da mdinoywotho dıbnele, di cyeşe kenşoyto u di hdoyutho umthoytoyo. U nuhomo, i bruktho wu hethotho kmadlın mi diloyto du cafro da abohotho”.

Bebzabno, MUB mawdacle d’ayna camo ma came laşan dfoyış cali rağlo u dımmathıl i hiyoyuthayde, masroyo bi harake mhayadto dıgımisomo, u bu temtiyo da mşalonwotho du doro li dukthoyo, uba melani mdawamle:

“u cedo d’Ha Nison Akitu, adyoma laşan du ağunaydan u du camaydan, latyo bılhude hfitutho maktabzabnoyto u marduthoyto. Liyan u camaydan kıtle sniqutho li hirutho, huwwe dımdabır ruhe, dhowe morıd dı statü, dımdafıc u dımşawşıt u leşono wa timoyothayde, u dmaqım mi holo i tahluka di lo athronoyutho. Calathe u cedo umthoyo Akitu camgabıd dkıtyo yortutho du maktabzabnaydan, remzo du darqublo u du ağunaydan di hiruthoyo’ste”.

Camgabıdathe, MUB mawdacle du cedo catiqo u şerşoyano d’Bethnahrin u du Madenho Mescoyo, u maktabzabno dıkmahke cala timoyotho du camaydanyo. Calathe, i marduthathe didan, wa athare dkıtla bi ruho di hdoyutho umthoyto klozım dmacışinala, u hawxa mdawamle:

“bu maktabzabno du camaydan camgabıd dhawi zabne mqalse, hawi’ste mezalyotho lo towe. Calathe, u maşıqlano me hatho kımqadım lu camaydan fırsat u mkone rabe. Camgabıdathe kcayşina şartat dkiban dmacışina a timoyothaydan bu athro da abohothaydan, dımmathlina i hiyoyuthaydan, dımcaydina a cede umthonoye u tawdithoyaydan bşıkıl ruşmoyo, u dhowina şawye cama came  hrene. Bu asasano xıd Mawtbo Umthoyo d’Bethnahrin kımcaydina u cedo umthoyo d’Ha Nison Akitu du camaydan, u kıqorina lkulnoşo dmoyıd duktho bu ağuno du mrodo u di hirutho umthoyto”.