Bu duxrono da 80 ışne du qmoro mqabıl d’Almanya i faşist tuhmonoyto, sim adyawma zawho folhoyo Rusoyo. Lu zawhano mıştawtafle u rişqutno du Sin Şi Jin Ping u hedor d’20 rişone d’athrawotho

MOSKO – U rişqutno d’Rusya Vladimer Putin bu mamlo dsımle adyawma bi cohnutho du yawmo di zoxutho mqabıl d’Almanya i tuhmonoyto, mqalasle i caşinutho dıkmahwe u gayso wa folhe Rusoye bu qrobo dmeqım kmo ışne. Putin mamtele ste lu bolo i mcadronutho da bnayqyome bu şuroro di zoxutho bu zabno du qrobo trayono dıbritho. 

Putin dmawdacle di şarirutho udi kinutho noqufene l’Rusya, makadle ste du athrayde kule ksonıd u hçomo dıkmisım cal Ukraina, u mırle “a’haylawotho Rusoye kımhaqıqi a’zoxıwotho bag bine du qrobo”. 

Camgabıdathe ubıthır mi ytawto dhawyo athmıl bayn d’Putin wu baramnayde du Sin Şi Jin Ping bu Kremlen, a’tre rişone makadlın cala n’esore qawye dkito bayn da n’athrawothaththe, ubebzabno mzaharlın du qento dhowe qrobo du nukler kul dkothe kzoyıd bu zabno dıkqoşın an’esore emwothoye, u sımlın ste qroyto la n’athrawotho du nukler dımqadmi lu şroyo da qetre bu darbo du diyalog xıd dkıtwe meqım bu zabno du qrobo jamudo. 

A’tre rişone d’Rusya udu Sin sımlın ste qroyto dmişarrıro i şalyutho bu madınho mescoyo, udmışrın a’krize ba darbone siyasi u deblomasi, ubebzabno mawdaclın dıklozım d’Suriya b’qaşyutho dkılyo mqabıl di marıhbonutho udi tuhmonoyutho. 

Putin u Jin Ping grışlın u zuhoro cal Rusya ucalu Sin dıkrıfdi a’fulhone dıksyamolın Amerika wu Nato dkımnasın dmarwıhi i şkihuthaththe bi qıtca d’Asya. 

Ubi sbutho d’Ukraina, a’tre gabe makadlın laşan dmımte l’şroyo aminoyo klozım dmitaqimi miholo a’celotho şerşoye du qrobo.