Bu muroyo dhawi bu gloho rabo du Swed bu haqlo du cılum-du yulfono, qmırlın tlotho clayme u tloth claymotho du camaydan bu fırco dkıtwolın

SÖDERTALJE, Swed – Beyn da 55 yolufe dkızzın ba madırşotho du gymnasium du Swed kule, dmatın lu final da buhone dsımlın b’fırce frişe, kıtwo’ste 3 clayme u 3 claymotho mu camaydan dıkqorın b’Telje gymnasiyet u dımqadamlın 2 projat.

U finalano’ste du muroyo-Clayme yadıcthone, simi cali netiçe da buhone dımqadamlın bu gloho dsim b’Södertelje Science Park dkıtyo bi karxutho. Hdo ma tarmıyothani d’Donita Barsoum, Elena Baryano u Marian Bena dsımlın buhono calu tathir dıktore u zawco du bahro cala haye’yo.

Bu buhono dsim, magle u tathir dıktorın gawne frişe cali zaricutho’yo wi netiçathe, gıdhuwyo bu dactith ğalabe mawthronitho bu haqlo di zaricutho-dilonoyith bu Swed dkıtyo u muzoğayde çamudo u catumo. İ proja hreto’ste d’Daniel Dawud, George Bardaxji u Şarbel Afram’yo dxlıqlın ale dıkmşahlıfo i harake du barnoşo lu kahrobo. Hathe kmifaşqo xıd şuroyo dmiqafe darbone ulsoye lu şroyo du qetro du energi.

İ tarmithathe da clayme, qmırla u snodo du camo dkıtwe hadiro. A muroyani kmisomi bu haqlo du yulfono du kyono-naturvetenskap, du teknik udu huşbono-du matematik. A farsufe dıkqumri ba muroyani kıqathe falge d’milyon krone u kibın dım’athli u Swed b’muroye Emwothoye