Bu taşroro dıfrısla Emwotho Mhaydotho grışla u zuhoro calu mınyono da tloye dıktucni zayno

Bu taşroro dıfrısla Emwotho Mhaydotho, grışla u zuhoro calu mınyono da tloye dıkmıjbori dtucni zayno u dımharbi ba qrobe.

Bu taşrorano Emwotho Mhaydotho mawdacla, bu zabno da Haylawotho d’Suriya Demoqratoyto manqaslın i mıştawtıfonutho da tloye ba qrobe, a ğrobe hrene dkito b’Suriya, mazıdlın u mınyono da folhe dkıtne nacime bu cımro.

İ mathlonitho dilonoyto du notarozo gawonoyo d’Emwotho Mhaydotho Virgina Gamba dıkhayro cali sbutho da tloye bıgawe du qrobo b’Suriya, frısla taşroro calu mınyono da nacime dıkmimodi li folhutho. U taşrorano dkıtyo da 3 dıkmitayıb, friş cal 1 bu yarho d’Tamuz da 2018 uhol 3 Hziron da 2020.

Bu taşrorano dcal Suriya, Gamba mawdacla, bıthır mıd a Haylawotho d’Suriya Demoqratoyto mdewolın meqım 2 eşne qyomo Emwothoyo leşan dlo mitcbır tloye li folhutho, manqaslın ğalabe u mınyono da tloye Mharbone bu garbay madınho d’Suriya. Ba 2019 kıtwo 216 tloye Mharbone uba 2020 kıtwo 41 wi sagiyoyuthathe b’Raqqa u b’Mabuğ’ne.

Bu taşroro mawdıc, gawonoyith b’Suriya kmitıstacmıli sistematik a tloye ba qrobe u kito hol 25 ğrobe; beynothaye a ğrobe sanode du rejim d’Suriya, a ğrobe dıkmısnodi me Turkiya, al Nusra uğer dkıtte 1.423 nacime beyn da folhathe; mani 117 claymotho’ne wa hrene kulle clayme b’cımro laltah da 18 eşne’ne u hatta kito nacime d’10 bu wahdo du qrobo b’İdlıb, Holob u Hama. A

Bu huthomo du taşrorano Virgina Gamba mhanela a hayle d’QASAD calu şuşotano u tlıbla menaye dımdawmi ba fulhonathe leşan dmaklın i mıştawtıfonutho da tloye li folhutho u sımla’ste qroyto la ğrobe hrene d’Suriya dmodın u qyomo Emwothoyo u dmawfıqi a tloye folhe dkıtte ba wahde du qrobo.