Bu taşroro dıfrısle Pentagon kobe mawdconutho cala grube marhıbone dı Turkiya

Bu taşroro dıfrısle Pentagon bhaq da fulhone folhoye d’Afriqa, mawdıc d’Turkiya mşadarla zıttır me hamşo alfo marhıbone d’Suriya lu athro d’Libya, bnişo dımcawni i şultonutho d’al Wifaq dkıtyo bi rişonutho d’Fayez al Sarraj.

 Me gabo hreno bu mamlo dsımla i mathlonitho d’Emwotho Mhaydotho bi sbutho d’Libya Stefani Wilyams makadla, dıkmidawım bu şedoro da zayne u da marhıbone l’Libya.

 I sbutho du qrobo gawoyo d’Libya dkımdawım bıthır munfolo d’Mucammar Qaddafi, u bu zabno haroyo ımşarelın hayle baroye dımathri cala sebwotho gawoye du athro. Bi mudaxalatheste mati u krizano l’darğo, da hayle baroyene dkibın dşorın u qetro u lo ahayle d’Libya.

Bıthır mıd d’Turkiya mdewola qyomo di awyutho cami şultonutho d’Alwifaq mşarewola dımşadro marhıbone u hın ma folhayda l’Libya, leşan dmaydi sahmo mu nafto dkıtla Libya. Ucdoste bu taşroro dıfrısla Pentagon mawdacla, du mınyono da marhıbone dımşadarla Turkiya l’Libya, kmote u mınyonathe l’zıttır me 5 alfo marhıbone.

U taşroro komır; Turkiya nqila a marhıbonani ba tayosyotho. A marhıbone dıkmidabri ma folhe Turkoye, ksaymi hawbe rabe mqabıl da mdinoye du athro. Me gabo hreno bi maqırhonutho dhula i mathlonitho d’Emwotho Mhyadotho Stephani Wilyams makadla, dıkmınqıl zayne u marhıbone l’Libya ma hayle baroye.

Bu mamlo dsımla Wilyams bu knuşyo d’Emwotho Mhaydotho, mahkele dıklozım u qetro d’Libya dmışre bu darbo du mahwo u şqolo dcamhdode.