Bu tboco froso du Iraq hiw duktho cali aykanoyutho da citotho du cameydan b’Mawsal

6 eşne bıthır mu kboşo da ğrube marhıbone d’Dacış cali mditho d’Mawsal u di daşto d’Ninve, heş kito mınyono celoyo d’citotho du camaydan hariwe u shife.

 Elo camaniste, mhathıth hın menaye leşan u camo dqodır dımsale ebeye u dmacış i tawdithayde i Mşihoyto. Bu tboco froso du Iraq, fris tebo cali aykanoyutho da citotho du camaydan bu Iraq.

Bu ağuno dhiw mqabıl du rejim catiqo du Iraq u bıthırste mqabıl da marhıbone dcal Qacida bi şato da 2003 u bu kboşo da ğrube marhıbone d’Dacış cal Mawsal wi daşto d’Ninve ba 2014, cayış u camaydan haşo, cnufyo, casqotho u acmayeste golutho ma dukothayde a şerşoye.

Ucdo şafıc 6 eşne cali zoxutho du gayso Iraqoyo cala marhıbone d’Dacış, wu heş kito mınyono celoyo d’citotho shife uğerste mabde hedi hedi bu bnoyo u bu hethothathe bu zabno du camaydan naqla hreto bdele docır la dukothayde bi daşto d’Ninve. A marhıbone d’Dacış, mahrawolın hol 30 citotho b’Mawsal u bı mdinotho frişe di daşto d’Ninve, mawqadwolın u mahrawolın a marhıbone hol 40 citotho wi sagiyoyutho du camaydan jbırwo dmahzım lu garbyo du athro.

Mathlo, i cito d’Mor Quryaqus bi mdito d’Batnaya dıknuflo 20 kilometre me Mawsal, heş lo mhathıtho mi bsirutho di mcadronutho. İ citathe dkıtyo di cito Kaldoyto d’Bobel, bınyowa ban 1944 u hol 70 ba mo di cito mahrıwowa me Dacış. Mıqa du camo tlıble mi şultonutho d’Boğdod uma tukose şarye heş noşo lo mqadamle leşan dmihathıtho i citathe.

Beyn da citotho dıbnın u dımhathıthi kito i cito d’Mor Çırçis b’Telesqof, mhathıthowa ba 2017, zabno bıthır mıd ğlıbwo u tukoso marhıbono. Me gabo hreno, bu zabnano du cedo zcuro, ğrub d’clayme Maşılmone me Basra mabdelın inisyatif u mfaraqlın 1.500 kartat u dışne du cedo cala yaqrotho du camaydan bi mditho d’Bağdede bi daşto d’Ninve xıd remzo di ahonutho da came.