03/02/2020

Bu zoyudo a tloyene dıkmiathri mu cnufyo d’Suriya

U tukoso Emwothoyo dıkmcaqıb i aykanoyutho da tloye bı britho, grışle u zuhoro cali aykanoyutho mahişonitho da tloye b’Suriya.

 U tukoso Mhafedo a Tloye m’akadle, da tloye’ne dıkmiathri bu zyodo mu cnufyo qaşyo dkito b’Suriya.

U tukoso Emwothoyo d’Save the Children-Mhafedo a Tloye, mawdacle dhol 400 alfo bnaynoşo mgalwelın ma dukothathe mcal fothe da hçome dıksoyım u rejim wu Rusya hani 2 yarhe calu qlimo d’İdlıb. U mede dıkgorış u zuhoro bi mawdconuthathe du tukoso, dfalge du mınyonano da galwoyani tloye’ne.

U tukoso mawdacle da hayle du rejim wu Rusya mahıtte u yuqro da hçomathe cal İdlıb ucal Holob bnişo dı qodır u rejim dmoyıd u duyoqo du darbo stratejikoyo dıkmasır Darımsuq camu garbyo du athro. Mcal fothe da hçomani, lfuth Emwotho Mhaydotho mgalwele 390 alfo bnaynoşo ma dukothathe bıgawe da 2 yarhe haroyani.

U tukoso Emwothoyo d’Save the Children kımawdıc, d’37 alfo tloye jbiri cama yaqrothathe dmahzımi bu yarho dı şafıcina ubı falgo dcayni yarho’ste, qtılwo 34 tloye u 13 neşe. Cala hçomani dıkmisomi cal İdlıb bu snodo d’Rusya udu İran, Amerika u Huyodo d’Urifi’ste maqşelın a tedbirathe calu rejim dıkdoyış a qyome di şalyuthzayno.

U mathlono dilonoyo d’Amerika bu koalisyon Emwothoyo James Jeffrey mawdacle, d’Amerika latla ucdo plan dmıgroşo me Suriya u Huyodo d’Urifi wu Huyodo Caraboyo’ste gıdloqın cal qariwo hıdode b’London leşan dorşi mın dawse hreto hathto gıdmhalqi b’Suriya. Jeffrey m’akadleste gıdmdawmi i methcadronuthathe cama hayle d’SDF ucamu gayso ıraqoyo bu ağuno mqabıl da ghrube marhıbone d’DACIŞ dıkmnasın naqla hreto dmaqwın ruhaye.

Check Also

İ sictho du hulmono di mdabronutho yothoyto hula mawduconutho rwıhto calu kewo di Corona

Tmınyo farsufe mayithi mi celtho du virus d’Corona, u zıd me 500 hrene tafilın u kewo ba f…