Calcole du qum bu Ciraq u Suriya. U İran thımle Turkiya dhawyo celtho la calcolani dkowın bu Madınho Mescoyo

Hani bzabno dşabtho, hawi 8 calcole du qum bu Cıraq u mcali aykanoyuthathe’ste, jbiro i şultonutho d’Boğdod d’suxro a madraşyotho, a makthbe ruşmoye u dmaklıyo a fyore da tayosyotho ba botaytawso du athro, u sımla adyawma yawmo du bıtlono bu athro kule, bıthır mıd ba mowat dıbnaynoşo nqili la bethkrihe.

A calcolani dımhelın’ste hatta u qlimo d’Kurdistan, mawdıc dhathe inaqla qamayto bıthır dore yarixe dkowe hawxa calole qaşye-dhol 75 farsufe nqili la bethkrihe. Me gabo hreno u calcolano du qum, mhele’ste u mdhıbro du garbay madınho d’Suriya.

U Mawtbo du hulmono d’Deyr Ezzor mawdacle, mcal fothe du gunhano du kyono, mvayaclın 10 farsufe a hayathe uba mowat kayıwe me yawme d’Huşabo uholucdo. İ sbuthathe da calcole dıkm’athro u İran’ste, xlıqla hfuxye mqabıl d’Turkiya. Tehran mawdacla, mcal fothe du bnoyo da masxore d’Turkiya, knuşfo i arco u kmıxlıq calcole du qum bu qlimo kule.

U calcolano u haroyo d’mati lu İran, kothe me beyn da nahre d’Froth u Deqlath ba dukotho di Mdabronutho yothoyto du garbyo udu madınho d’Suriya. U İran mırle; Ahna lıkmaqbılina d’Ankara dmahrıwo i aykanoyutho du mahduro udu kyono, bu bnoyano da masxore dhawın qetro rabo la came dan athrawotho şbobe du qlimo.