07/03/2020

Çelik nqile u qatro da yolufe mşihoye ba madraşyotho d’Turkiya lu parlamento

U qoyumo du cameydan bu parlemento du athro d’Turkiya mu gabo demoqratoyo da came Tuma Çelik nqile u qatro da yolufe mşihoye ba madraşyotho d’Turkiya lu parlamento.

 Bu mamlo dsımle bu parlemento mırle: a yolufe mşihoye d’latne majbur dcıbri la herge di maşılmonutho, kcayşi casqutho rabtho bi sbuthathe u hın mane bi zoriye kmitacıbri.

 Çelik bu mamlo dsımle bu parlamento d’Turkiya mırle; A yolufe da Mşihoye mucafne ma herge di tawditho, elo bu zabnano dkıtne mucaf bhın duktho hawi taşniqo cala yolufe da Mşihoye uda Yudoye.

Çelik mırle; Metul a yolufe leşan dlo cıbri la hergani di tawditho, klozım dmamtın warqe dıkmthabti dlatne Maşılmone xıd dıkmıtlıb naqlat warqe di macmoditho aw ğer menaye, leşan dmithabıt dkıtyo Mşihoyo. U hathe kmıtloboste ma yaqrotho da yolufe dımtahbti dkıtne Mşihoye aw Yudoye.

U qoyumo Suryoyo mırle; Bu şıkılano a yaqrotho dlatne Maşılmone klozım dımthabti u dmahwın ruhaye dlatne Maşılnmone u hano kewo drişo la yaqrothaniyo. Kımakfe da yaqrothani dkıthwi egartho u dmawdıci dlo kubci dcıbri a nacimathe la herge di tawditho metul dkıtlın tawditho mşahlafto.

Bı Turkiya a herge di tawditho masrene bu yulfono di Maşılmonutho, mawxa a yolufe dlatne Maşılmone, jbiroyene dcubri la hergani lfuth u qonuno du athro. Elo a mşale da madraşotho bu şıkıl dıksaymi, kmacjısi a yolufe wa yaqrothani u mawxa u qoyumo du cameydan bu gabo d’HDP nqile i sbuthathe lu parlamentıo du athro leşan dımıgrış u zuhoro acla.