CENTCOM-QTİL 13 MARHIBONE-CUQOBE SURİYA U CIRAQ

US Central Command-CENTCOM dkıtyo i mdabronutho qentrunoyto d’Amerika huwla athmıl mawdconutho cala marhıbone dqtili bu yarho d’İlül ubu yarho d’Teşrin u qamoyo dşaficina b’Suriya ubu Cıraq. Bi mawdconuthathe m’akıd, ba 79 cuqobe dsımlın a hayle du koalisyon Emwothoyo b’Suriya ubu Cıraq, qtilın 13 marhıbone d’Dacış.

Ba cuqobani dsimi bi methcadronutho da hayle bnay’qyomo du koalisyon Emwothoyo-awkith a hayle d’QASAD dkıtne bu garbay madınho d’Suriya uda hayle Cıraqoye, qadiri’ste dmıski 78 marhıbone. B’Suriya qtil 3 marhıbone u msik 45 b’23 cuqobe frişe dsimi bu garbay madınho d’Suriya.

Bu athro du Cıraq’ste simm 53 cuqobe dhawın celtho lu qatlo d’10 marhıbone ulu msoko d’33 hrene. Beyn da marhıbone dımsiki ba cuqobani, kıtwo mşale frişe d’Dacış uda krılyothayde. Bu msokano’ste, makle mınyono d’tahrazyotho d’hçome u 3 nesyune du texliso da noqufathe.

U rabhaylawotho d’CENTCOM Michael Erik Kurilla m’akadle dgımdawmi u ağonathe hol dmıqşıc u tukoso marhıbono u d’naqla hreto dlo qoyım li rağlo. CENTCOM mşakalwo ban 1983 ubu garbay madınho d’Suriya kımdawım u snodayde wu ağonayde cama hayle d’QASAD.