CIRAQ: Droşo şuhlofo qusre d’Saddam Hussein l’bethcatiqotho
İ daira da Athare du Cıraq, tlıbla mi şultonutho d’Boğdod dmişahlıfi hın ma qusre du rişono catiqo Saddam Hussein, l’bethcatiqotho. Lfuth u rişono di daira da Athare, i bethcatiqotho Athronoyto dkıtyo b’Boğdod, layt eba duktho makfıyonitho lu tehito da athare makthabzabnoye kulle dkıtle u Cıraq.
U tbocofroso du Cıraq mawdacle di daira da Athare udi Yortutho du athro mqadamla athmıl talab li şultonutho, leşan dmişahlıfi a qusro du diktatör catiqo Saddam Hussein l’bethcatiqotho. İ mawdconuthathe’ste hiwo mu rişono di dairathe Laith Majıd Hussein.
Hussein mawdacle, dcal di bethcatiqotho Athronoyto d’Boğdod law fayış eba duktho leşan u froso dban alfayo d’athare catiqe, kito sniqutho dmişatıs mınyono d’botaycatiqotho leşan dmitahti a athare dıkmitawfıqi ba dukotho du arkeloji. İ bethcatiqotho d’Boğdod kıtla 24 salone u kulle’ste malye’ne athare dımqafın.
Lfuth Hussein, elo heş kito ğalabe athare dlatte duktho dmıfrosi u dmitahwın lu camo. Ğer hiğmonwotho’ste kibın dsaymi xıdu mede dsımla i bethcatiqotho d’Basra-dkıtyo qusro du rişono catiqo dımşahlıfowa l’bethcatiqotho ba 2016 u ftihowa bıthır lu camo ba 2019 u kiba an athare catiqe d’Bethnahrin. Kito plan dmişahlıf u qusro catiqo di rişqutnutho b’Bobel l’bethcatiqotho u cal qariwo.
Hussein m’akadle dkito ğalabe dukotho bi arişkoyto’ste dkibın dmıftohi xıd bethcatiqotho lu camo u dgurşi socure me britho kula. Lfuth u rişono di dairathe’ste, u rişwazire Mustafa al Kadhımi kısonıd u renyano da bethcatiqotho. Saddam Hussein, kıtwole zıttır me 100 qusre u villat bu Cıraq u ğalabe menaye manhıbiwo bıthır mu qrobo da 2003.
Putin hule şudoyo dgımdawım u fulhonayde leşan u sutoro da Mşihoye bu Madınho
U rişono d’Rusya Vlademir Putin bi maqırhonutho dhule lu tbocofroso, makadle dkobıc dımdawım bu …
