22/11/2023

CIRAQ GIDNOFIQ MORO MATHLONWOTHO NUXROYE

Bu mamlo dhawile athmıl u rişwazire Cıraqoyo cami rişathizgadto d’Amerika b’Boğdod Alina Romanowski mkararle dgımdawmi bu duyoqo di mşaynutho da mathlonwotho diplomatiqoye dan athrawotho nuxroye dkıtne bu Cıraq.

 

Bu yawmoyo di ytawtathe al Sudani u Romanwoski kalın cali methcadronutho dbeynothaye, cala şuşote haroye du qrobo beyn İsroyel u Hamas ucalu yuqro dıkmato Boğdod bnişo dmitaklın a hçome dıkmisomi cal Amerikoye.

 

U mamlano d’al Sudani mkarır li rişathizgadto, bu zabno da hçome kımdawmi cala nuqazyotho dkıtle Amerika bu Cıraq. Al Sudani mırle; Ahna masrena bu şudoyaydan, dımhamena a mathlonwotho nuxroye u dım’amnina i mşaynutho da hayle du koalisyon Emwotyoyo dkobe ağono mqabıl du tukoso marhıbono d’Dacış.

 

Mu zabno dımşarele u qrobo beyn İsroyel u Hamas, kmisım hçome cala nuqazyotho d’Amerika dıksaymi baytoyutho la hayle du koalisyon Emwothoyo dkobe ağono mqabıl d’Dacış bu Cıraq ubı Suriya.

 

A hçomani’ste kmisomi ma hayle noqufe du İran dkıtne bu Cıraq cala Amerikoye, cal dkıtyo bnayqyomo d’İsroyel. Xıd funoyo’ste, sımla Amerika şişaltho d’cuqobe casye cala haylani dkıtne bu Cıraq ubı Suriya.