Cadcido, Caynkawa. Surto: Allen Kakony
07/04/2022

CIRAQ: Mcayid Ha Nison u Cadcido di Yortutho Suryoyto b’Caynkawa

U cadcido trayono di yortutho Suryoyto dımtayıb bi qastra d’Caynkawa bu garbiyo du Ciraq, adyawma hthımle a’hfitwothayde dımdawamlın ltotho yawme. La hfitwothani dımgaşamlın i mdinoyutho makthabzabnoyto du camaydan d’Bethnahrin, mıştawtafle menyono celoyo d’rişone citonoye, wazire u mşale bi şultonutho d’Arbil u mathlone deblomasi ma izgadwotho dhın athrawotho Caraboye u Macırboye.

07/04/2022

CAYNKAWA, Ciraq – Bi cohnutho di rişıdşato umthoyto Suryoyto Bıbloyto Othuroyto d’Akitu, i mdabronutho gawonoyto di mardutho udi amnorutho Suryoyto du Ciraq, mtayabla bi qastra d’Caynkawa bi hiğmonutho d’Arbil, u cadcido trayono di yortutho Suryoyto dımdawamle tlotho yawme. U cadcidano dımşarele bu qyoso du şorito du futho, mıştawtaflele i qadişutho du fatıryarxo di cito d’Madınho d’Othuroye Mor Awa Tlithoyo Rowel, u rişono di marcitho Kaldoyto d’Arbil hasyo Mor Başşar Matti Warda, u rişono di marcitho d’Mawsal di cito Suryoyto Ortodoksoyto hasyo Mor Niqodimos Dawud Matti Şaraf, u rişono di marcitho d’(H)adyab di cito Suryoyto Qatholiqoyto Mor Nathnael Nizar wu mcadrono fatıryarxoyo di cito d’Madınho d’Othuroye Mor Apres Yuxanna.

Lu cadcidano mıştawtafle ste u waziro du yulfono celoyo bi şultonutho d’Arbil Aram Muhammad Qader, u waziro du nqolo uda n’esore gawoye Ano Jawhar Abdoka, u waziro du qlimo dıkhoyır cala sebwotho da came qalile Aydın Macruf, u hiğmuno d’Arbil Omid Xoşnaw, u qaymaqam d’Caynkawa Rami Nuri Seyawiş, a’izgade d’Rusya, Polonya, Fleşt ud’ğer athrawotho, kohne, qoyume, mşale di şultonutho, mathlone du kenşo mdinoyo uba mowat du camaydan d’Caynkawa udu garbiyo du Ciraq.

Bıthır mu futoho dsim, a’hadire karixi bu Pazar dıfris ebe lbuşe marduthoye, muklone camonoye u şuğlone di ido du camaydan. İ hfitutho ruşmoyto du cadcido, mşarela bu nqoşo d’Operet dımqadmo mi gudo d’Napo d’athyo mi mditho d’Bobıl. Camu nqoşo di Operet, calymo u claymtho mu camaydan dılwışlın a’l buşe du malko udi malıktho d’Bobıl, şafici mu tarco du cadcido u mhalaxlın lafa hadire hul dmatın lu masırho, ubıthır mathe i gudo d’Napo mqadamla Operet dıkmahkiyo i teşcitho da mdinoywotho d’Bethnahrin.

Camgabıdathe, i gudo Suryoyto d’Barmaya d’athyo mi mditho d’Beth Zalin (Qamışli) mu athro d’Suriya mqadamla raqde du folklor marduthoyo. Ubıthır mathe u cadcido mdawamle cama qole d’menyono celoyo ma zamore du camaydan du Ciraq.