Dacır 35 yaqrotho mu cameydan l’Batnaya di daşto d’Ninwe

U menyono da yaqrotho du camaydan dıdaciri li mditho d’Batnaya di daşto d’Ninwe, mati l’32 yaqrotho. Be bzabno, mawdıc dkito casqıwotho qum d’hın yaqrotho du camaydan dkıbci dıdıcri la botaththe bı Batnaya.

Hın yaqrotho du camaydan dıdaciri ba zabne haroyani li mditho d’Batnaya di daşto d’Ninwe, mawdaclın du menyono da yaqrotho dıdaciri hul ucdo l’Batnaya lıkşofıc a’35 yaqrotho.

U camaydan dıdacır l’Batnaya mathkarleste da yaqrotho hrene dımgalwelın li mditho d’Nuhadra bu qlimo d’Kurdistan kıtlın ucdo i zuctho du dcoro udmabdın haye yawmonoye b’şartat casqe.

Kliver Nejib dkıtyo farsufo mu camaydan dıdacır l’Batnaya, bi maqırhonutho dhule li dafo d’Ankawa mırle “a’yaqrotho dıdaciri kqathlın snodo ya mi cito u yaste ma tukose noşoye, elo gawonoyith a’comure sniqoyene heş l’tuxlono rabo, laşan dıdıcri m’hatho la botaththe bı Batnaya udımdawmi a’hayaththe a’yawmonoye xıd meqım. Camgabıdathe kitoste ucdo hın yaqrotho dkımnasın d’şorın a’qetre dkito bqamuthaye bnişo dıdıcri li mdithaththe d’Batnaya”.

Be bzabno, Nejib mawdacle dlayto sniqutho l’kahrobo aw l’maye bı Batnaya, elo a’yaqrotho dkıtlın nacime bu maşıqlo du yulfono du Jumnasyet laybın dıdıcri ucdo l’Batnaya cal da madraşyothani heş lıssim u futohaththe, ubalhude kito madraşto şarwoyto dsim u futohayda bi mditho.