Dacış kobıc mzabın nacımto Ezideyto dıhfitowalın b’Şigur

U tukoso marhıbono d’Dacış dıhtıfwole nacımto Ezidoyto, kobıc ucdo dımzabanla b’20 alfo dolare.

 I iqarthayda dmawdacla dlatla mkono dobo a zuzani, sımla qroyto la tukose noşoye dımsarhıbi bu texliso di barthathe, meqım mıd mvayci anesorathe cama marhıbone hatofe d’Dacış.

 Bıthır mıd şafıc şeth ışne calu htofayda mi fnitho d’Şigur bu garbiyo du Iraq, u tukoso marıhbono d’Dacış mawdacle dkobıc dımzabın nacımto Yezidoyto mqabıl d’20 alfo dolare.

U babo di nacımto htıfto bi maqırhonutho dhule li dafo d’Yezidi 24 mırle “tlotho bu yarho d’Ob i şato da 2014 bu zabno du qtolcamo dsımwo cala Yezidoye b’Şigur, u tukoso marıhbono dı Dacış htıfwole i barthaydi dcımra 9 ışne cam 21 hadome hrene mi iqarthaydi. Umu zabnawo dmawbıliwole Dacış l’dukotho dlatne idice, mvayacwolan anesoraydan acmaye, uknıtrinawo dothe xabro menaye. Cayşinawo casqutho bu zabno duhtofo d’barthi, wucdo kcayşina i casqutho du texlisayda”.

Bebzabno, u babo di nacımto Yezidoyto mawdacle dmeqım kımo yawme athilın xabro bu talafon dı Dacış mahtole lu zbono, elo cal dlatlın mkone momunoye kzayci dımvayci i barthathe naqla hreto bıthır mıdşafıc şeth ışne calu htofayda.

Calathe, u babo di nacımto Yezidoyto sımle qroyto la tukose noşoye ula noşe dkıtlın mabco towo, dımcadri bu texliso di barthaththe dıkmıtlıb mqabıl du terfiyayda 20 alfo dolare.