Danmark mşadarla tayosyotho du qrobo l’Grönland

KOPENHAGEN — İ şultonutho d’gzırto rabtho d’Grönland huwla maqırhonutho lu tbocofroso u magela, du gayso d’Danmark, gıdmazıd i ithuthayde i folhoyto bi gzırto u cal qariwo gıdmşadır tayosyotho du qrobo leşan dsaymi dawriyat du duyoqo di mşaynutho du macırbo du sforyamo di gzırto. Bu zabno dgımşare u qayto b’Arktis, kibın a tayosyothani dfayri cali gzırto.

Elo camgabe da tayosyothani d’F-16’ste, gıdmşadro Danmark helikoptere du transport u sfinotho du qrobo leşan u snodo da cuqobani. Bi mawdconutho dhuwle u waziro du sutoro d’Grönland Troels Lund Poulsen mırle; İ ithutho da hayle di mşaynutho d’Danmark gıdmisomi lfuth a şarat du qlimo uda qetre dilonoye di mşaynutho di gzırto.

U şwolano di gzırto grışwole u zuhoro dbritho, bıthır mıd u rişono Amerikoyo Donlad Trump bu şuroyo di şatathe ğalabe naqlat mbahaswole, dkobıc i gzırtathe leşan i mşaynutho d’Amerika. Bu mamlayde Trump mzaharwole’ste u mırwole; 

-b’darbo aw d’darbo hreno-hatta en dlozım bu cnufyo’ste dhowe, gıdmaydina u kontroll d’Grönland. 

 Ban 1700 mıştacmarwola Danmark i gzırto d’Grönland uban 1950’yat, law fayişowa i Grönland xıd koloni d’Danmark, elo mfaşqo xıd marcitho du athro. Ban 1979 hawila Grönland mdabronutho yothoyto elo a esorayda cam Danmark’ste heş kımdawmi-awkith u haqlo di siyase di baroyutho udi mşaynutho d’Grönland kmisım mu athro d’Danmark.