Danmark sımle i mşablonutho di folhutho alisto awkith çbari cala neşe

KOPENHAGEN — Bu zabno dkito zuctho b’Urifi bu haqlo di mşaynutho, ubu zabno dkımnasın an’athrawotho d’Skandinavia dmizdi u menyono da folhe udmaqwın imkone du sutoraththe, u athro du Danmark ste bıthır mu athro du Swed sımle i mşablonutho di folhutho alisto awkith çbari cala neşe.

U fusqonano fayıt ucdo la haye xıd funoyo lu qonuno dmaqbewole u parlamento dı Danmark bu yarho d’Hzirın bi şato da 2023, udıkçobır a’neşe dcımraye 18 ışne dımqaydi ruhaye laşan dmıhze mıqqa kşowın li mşablonutho di folhutho, wu medano meqım balhude cala gabre kmitabaqwo. 

Hul ucdo i mıştawtfonutho da neşe li folhutho bu Danmark lfuth u sebyono wa, wa neşe folhe bi şato dşaficina kımmathliwo 24% ma folhe dı Danmark. 

Bu taro di dawsathe, a’haylawotho folhoye du Danmark ksaymi ucdo şuhlofe ba maşıryotho laşan dmitahwe funoyo la sniqwotho da neşe dıkmıştawtıfi li folhutho. 

I şultonutho dı Danmark kıbco ucdo hedi hedi dmazido u zabno di mşablonutho folhoyto m’arbac yarhe hul 11 yarhe bi şato da 2026, ukıbco ste dmazido u menyono da folhe m’5 alfo hul 7 alfo u 500 bi şato da 2033. 

I dawsathe athyo luhwoyo bıthır mıdmati u athro du Danmark l’awyutho cama şorikayde du Nato, bi şabtho dşaficina dmitazido i buçça du sutoro.