DAŞTO D’NINWE: Mtayıb u cadcido rbicoyo d’Mor Gorgis b’Tellesqof

TELLESKOF/CAYNKAWA, Ciraq – Yawme d’Tlotho dşaficina, sim u futoho du cadcido rbicoyo d’Mor Gorgis bi qastra do Tellısqof di daşto d’Ninwe. U cadcidano dsim u futohayde bi cito d’ Mor Gorgis, mşarelın a’hfitwothayde bu mamlo dsımle qaşişo Karam Nejib Qaşa u mamlo hreno dsımle u hasyo Mor Bulıs Tahbıt. Lu cadcidano mıştawtafle u rişono di marcitho Kaldoyto d’Alqoş hasyo Mor Mixael Maqdisi, u qaymaqam dı Telkepe Basem Bıllo u menyono d’xuroye u kohne u mşale d’şutose cam farsufe dkıtne idice b’gawıd du kenşo.

Bıthır mathe, sim u futoho d’methhawyonutho di amnorutho ba salone d’Mor Afrem, udmıştawtaflela a’madraşyotho dı Tellısqof dıfrıslın eba surotho u syome mşahılfe di ido. Ubıthır mathe sim hfitutho du rşomo hiro. Ubu huthomo du yawmo qamoyo du cadcido, mtayıb masrahto di claymutho bu calwa “u cabdo da zuze”.

Adyawma ste mtayıb muroye di esfirsalo bi madraşto d’Alsinaca bı Tellısqof, u yawme d’Şabtho dıbqamuthayna gıdmitayıb muroye marduthoye ba salone d’Mor Afrem, u ramşitho d’qole citonoye bi cito d’Mor Gorgis. U yawme d’Huşabo dıbqamuthayna dkıtyo u yawmo haroyo du cadcido, gıdmisım u futoho du hayklo d’Mor Gorgis, u gıdmitayıb ste masrahto, teştıcınye, lottori u raqde camonoye.

Mxasra hreto, ubi rocyutho du rişono di marcitho d’Mawsal ud’hedora di cito Suryoyto Ortodoksoyto hasyo Mor Niqodimos Dawud Matti Şaraf, a’boduqe Suryoye d’Caynkawa mtayablın ramşitho bu calwa “şharu u msalayu”. İ ramşithathe dımtaybo bi cohnutho di şabtho du haşo, mqadım eba turgone cal tloth sebwotho dkıtne: u fesho, u bustono da zaytune wu teşlimo d’Yeşuc la Yudoye.

Bi ramşithathe ste, hasyo Dawud Matti Şara mqadamle şukono lu rişono da boduqe George Alxalil, xıd iqoro la fulhone dsımle bi şatathe bu haqlo da boduqe Suryoye.