DAŞTO D’NINWE: Wazire ciraqoye simlin socurutho li Dayro d’Mor Matta

DAŞTO D’NINWE – U waziro du sport udi claymutho bi şulonutho du Ciraq Cadnan Darjal wu waziro du snoco Manhal Alxabbaz, sımlın socurutho li dayro d’Mor Matta da Suryoye Orthodoksoye dıknuflo bu turo d’Alfof bi daşto d’Ninwe. A 2 wazire mıstaqıbli mu rişdayro hasyo Mor Timothawos Musa Alşamani umı menyono d’kohne u dayroye di marcitho.

Bi socuruthathe, Darjal u Alxabbaz karixi a ferce u qeloyotho di dayro u mıdlın mawdconutho calu makthabzabnayda, u griş u zuhoro calu dawro msimono dmıştacele u camaydan bu bnoyo di mdinoyutho catıqto du Ciraq. A 2 wazire mıdlın mawdconutho cala tahwiyotho makthabzabnoye di dayro d’Mor Matta dımşatsowa bu doro rbicoyo di Mşihoyutho, u şafıco b’maşıqle mşahılfe.

Elo i dayro lo hzewola husrone ba zabne dkbışwole Dacış i daşto d’Ninwe. Mxasra hreto, i sictho d’Mor Mixa di mcadronutho citonoyto mtayabla muroye du tworo da bece du cedo di Qyamto bi qastra d’Alqoş bi daşto d’Ninwe. İ hfituthathe dımtaybo 20 bu yarhano, mıştawtaflela ba mowat du camaydan dlayimi bu wahdo d’Alqoş.

U futoho di hfitutho sim mu rişono di marcitho hasyo Mor Bulıs Habib Thabet, u bıthır u mamlo du kohno d’Alqoş qaşişo Salar Budaq. Meqım ma muroye, hasyo Thabet maqımle teşmışto u mbaraxle a bece dmahti cali tablitho. Camu musqi wu zmoro, an abne du camaydan d’Alqoş rabe, neşe u nacime mıştawtaflın la muroye du tworo da bece du cedo. U cyodano du tworo da bece mardutho catıqto du camaydan d’Bethnahrin’yo, wu kromız i qyamto d’Moran Yeşuc Mşiho mu qabro.