Demirtaş mawdacle walaw dmısxoro i HDP’ste bas u ağonayda li demoqratoyutho lı kole

‘Walaw dmısxoro i HDP, naqla hreto lıgmaklıyo u ağonayda leşan i demoqratoyutho’ a melani du rişono zawgoyo catiqo di HDP Selahattin Demirtaşne.

Demirtaş dkıtyo bu hbuşyo d’Edirne, huwle maqırhonuthathe bi dafayde du Twitter cali aykanoyutho harayto d’Turkiya u cala fulhone dıkmaşe AKP, leşan d’soxır u gabo Demoqratoyo da Came.

A 2 rişone zawgoye catiqe du gabo d’HDP, msikiwo bu yarho d’Teşrin u haroyo da 2016 u mahtiwo b’hbuşye frişe, ma thome di asirutho dcamu gerilla di PKK. Bıthır mu inqilab folhoyo dımnasewo dmisım cal Ankara, mabdewo kampanya rwıhto du msoko dba casro alfayo dıbnaynoşo, beynothaye mınyono celoyo d’hadome d’HDP.

Bi kampanyatheste, i şultonutho d’Erdoğan maqımla i hasinutho d’qoyume di HDP, leşan dmahtolın ba hbuşye u dmatimo u gabo saqıbloyo d’HDP.Adşabtho’ste mido i hasinutho du qoyumo Gergerlioğlu u mqadım dacwa lu bethdino Turkoyo, leşan dmısxır u gabo di HDP. Calu qedomano d’Turkiya, athrawotho frişe du macırbo mahwelın hfuxye u krıhlın i siyasathe d’Erdoğan, dıkmawbılo u athro lafi marhıbonutho.

Ucdo’ste u rişono zawgoyo catiqo Selahattin Demirtaş frısle egartho bu darbo du sniğrayde calu qedomo qaşyo d’AKP l’HDP-dıkmifaşıq gabo da came. Demirtaş athmıl mırle; HDP lıgturyo mu ağonayda leşan u şlomo wi demoqratoyutho-walaw dothe dmısxır’ste. Mın netiçe dnufqo, ahna gıdmdawmina u darbaydan wu xtutaydan li demoqratoyutho u m’akdena’ste, dgımotina bi harayto li zoxutho.

Demitaş mırle’ste; U mkono du sxoro di HDP, latyo belhude dyoşo du moral-elo hawbo jıddi mqabıl du nomuso esonoyo’yo. Athmıl’ste ba cuqobe dsımle u polis Turkoyo b’mdinotho frişe, msıkwole hol 35 Kurdoye u hadome d’HDP. A hçomani dcali HDP’ste kmisomi bu zabno da Kurdoye kımcaydi u cedathe du Newroz u dıkmıdroşo i sbutho di aykanoyutho du rişono Kurdoyo Abdullah Öcalan.