Donald Trump maklele i madatho du gımrık bu timo d’50% calu Huyodo d’Urifi
U rişono d’Amerika Donald Trump mşawharle u tehito di madatho du gımrık bu timo d’50% cala mluwe dıkmişadri l’Amerika mu Huyodo d’Urifi. Trump mawdacle ste dmaqbele dmawrıx u siqumo haroyo da droşe dcali tagorutho calu talab dhawila i rişonitho du komisyon d’Urifi Ursola Von Der Layyen.
WASHINGTON / BRUKSEL – U rişono d’Amerika Donald Trump mawdacle dgıdmawrıx i muhle di madatho du gımrık dmahtole calu Huyodo d’Urifi, bu zabno dgıdımdawmi a’bazare dcali tagorutho bayn da tre gabe.
Trump bu mamlo dsımle athmıl la gelyunore mırle “ba n’esore dhawili cami rişonitho du komisyon d’Urifi Ursola Von Der Layyen, mawdıclila dmaqbeli u talabayda dmitawrıxo i muhle haroyto di madatho du gımrık dımbaynowa ha bu yarho d’Hzirın hulu yarho dı Tamız dıbqamuthayna. A’grube da bazare d’Amerika udu Huyodo d’Urifi gıyıtwi b’surhobo laşan dıhzena ida dkibe dmımte l’şroyo bi sbuthathe”.
Meqım mathe, Trump mawdacwole dkobıc dmahıt madatho rabtho du gımrık cala mluwe dkothın l’Amerika mu Huyodo d’Urifi. U fusqonano gıdfatwo la haye ha bu yarho d’Hzirın dıbqamuthayna. Trump mırwole ste “a’droşe di tagorutho dcamu Huyodo d’Urifi kızzın lu xalyo. Mawxa ste kobıc dmahıt madatho rabtho bu timo d’50% cala mluwe dıkmişadri mu Huyodo d’Urifi”.
M’gabo hreno, Von Der Layyen bi maqırhonutho dhula athmıl mawdacla du mamlo dhawila bu talafon cam Trump towo fayıt, u makadla du Huyodo d’Urifi hadiroyo d’romış b’surhobo bi sbutho da bazare dcali tagorutho. Von Der Layyen mırla ste “laşan dımtena l’qyomo towo, sniqoyena l’zabno hul 9 bu yarho dı Tamız dıbqamuthayna”.
Putin hule şudoyo dgımdawım u fulhonayde leşan u sutoro da Mşihoye bu Madınho
U rişono d’Rusya Vlademir Putin bi maqırhonutho dhule lu tbocofroso, makadle dkobıc dımdawım bu …
