Donald Trump mbayanle i sniğartayde dmeqım Alina Habba dkıtyo ma n’abne di cito Kaldoyto du Ciraq, bi wolitho d’mqimathdino gawonoyto zabnoyto lu qlimo d’New Jersey

NEW JERSEY, Amerika – Trump bi maqırhonutho dıfrısle bi dafayde dı Truth Sosial mırle “i sniğarto Alina Habba dımathılali b’dacwat rişoye meqım mi zoxuthaydi ba guboye di rişonutho d’Amerika bi şato da 2024, gıdmaydo i wolithayda i hathto xıd mqimathdino gawonoyto zabnoyto lu qlimo d’Newjersi”. 

Lfuth u ajans dı Blomberg, Habba kıtla ucdo i wolitho d’mşawronitho du rişono Donald Trump bu Qusro Heworo. 

Trump bi maqırhonuthayde, mawdacle ste d’Habba gıdmafito i wolithayda i hathto la haye b’kaşirutho xıd makşarwola meqım bu fulhonayda xıd sniğarto. Lfuth Trump Habba gıdfılho ste b’ulsoyutho laşan dmisım u garanti d’mitarku sistem qonunoyo kino la comure d’Newjersi. Habba gıdmaydo i wolithathe calruha b’şıkıl zabnoyo hul dımbayın Trump mqimdino aminoyo l’Newjersi. 

Habba bi şato da 2021 msıkwola a’dacwat qonunoye ulsoye dkulle dkıtwo bhaq dı Trump, baynothaye i dacwa di hile dmaqmowola i mqimathdino gawonoyto d’Newyork mqabıl di şırke dı Trump, u dacwat hrene xdu teşhir ğensoyo dmaqmiwo mi xasra di kothubto Ey Jin Carol. 

Alina Habba dkıtyo ma n’abne du camaydan di cito Kaldoyto, mawlıdo bi mditho d’Somit bu qlimo d’Newjersi, wi iqarthayda mgalwewola mu Ciraq lu athro d’Amerika ba tmoniyat du doro dşaficina.