Emwotho Mhaydotho frısla taşroro cala htofe dhawi cala mtagliyone

Emwotho Mhaydotho frısla taşroro cala htofe da mtagliyone bu Iraq. Mawdıc ba tagliyothani dımşarewolın bu yarho d’Teşrin u qamoyo dı şafıcina, htıfwo hol 123 farsufe u heş 25 menaye mvaycene.

 U makthIbo da zedqe noşoye bu tukoso d’UNAMİ makadle, a farsufani mafiti bı teşniqe u cnufyo qaşyo, u calathe sim qroyto li şultonutho d’Boğdod, dsaymo buhono rwiho bi sbuthathe.

I mathlonitho du notarozo gawonoyo d’Emwotho Mhaydotho bu Iraq Jeanine Hannis-Plasschaert dkıtyo i mşalonitho du tukoso d’UNAMİ, frısla athmıl taşroro calu qedomo da hayle di mşaynutho la mtagliyone Iraqoye.

Bu taşrorano mawdıc, da tagliyotho mqabıl di şultonutho d’Boğdod mşarewolın bu yarho d’Teşrin u qamoyo dı şafıcina uholucdo ubu zabno da tagliyothani, sim hJome qaşye calu camo uba mowat dfarsufe msiki u mınyono celoyoste htifi mu wahdo da tagliyotho.

U taşrorano d’UNAMİ mawdacle, dkıtte 123 dacwat dfarsufe dımvayci ubeyn dani mqafe 98 mtagliyone elo heş kito 25 farsufe mvayce. Ba buqore dsimi cama farsufaniste magle, dmafiti bı cnufyo u teşniqe qaşye. Bu zabno da taxtuşe dhawın ba tagliyothani’ste, qtılwo 490 farsufe, mçarahwo 7.783.

Hannis-Plasschaert mawdacla, dıklozım i şultonutho dmarkıwo komisyon dilonoyo leşan dımqafe mawdconwotho u ithbate bi sbuthathe u dsoyım buhono rwiho cala htofani bnişo dmihaşwi a hayle dkıtne bıthre da htofe uda teşniqani dhawın. A Şica d’Haşd al Şacbi, hın ma hayle rişoye dıkmıthomi bu tuyobo du cnufyano mqabıl da mtagliyonene.