Emwotho Mhaydotho mkararla i qroytayda li şultonutho zabnoyto d’Darımsuq, dımşawşıto u nomuso esonoyo hatho dkibe dım’amın a zedqe da qalilotho du athro kulle

U şwolo du nomuso esonoyo hatho dımbayanla i şultonutho d’Ahmed al Şarıc, kımdawım dhowe celtho l’hfuxye Emwothoye u qlimoye, cal dlo hşiwi ebe a came tawdithoye u etnikoye d’Suriya kulle. İ sbuthathe mido li ido mi dafo d’Rudaw dsımla maqıblonutho camu tahlufo du malolo du notarozo gawonoyo d’Emwotho Mhaydotho Farhan Haq b’New York d’Amerika.

Bu mamlayde Farhan Haq m’akadle i klayto d’Emwotho Mhaydotho bi sbuthathe u mawdacle, d’Darımsuq klozım dımşawşıto u nomusano u dhubşo bıgawe u dım’amno a zedqe da qalilotho du athro kulle. Haq mırle; Hatheyo’ste i celtho di lo thnihutho udu hfuxyo d’xliq mqabıl di şultonutho d’Darımsuq bıthır mıd lo hışuwla a qalilotho kulle xıda Mşihoye, a Druz, a Callawiye wa Ezidoye.

U rişono Ahmed Alşarıc, mdewole yawme d’Hamşo dşafıcina i maqırhonutho du nomuso esonoyo hathto u dhiw ebe u yuqro kulle li Maşılmonutho-awkith du rişono du athro klozım dhowe Maşılmono, dmisım şuhlofo kull 5 eşne naqla udu athro’ste dfoyış ışme-i qutnutho Caraboyto d’Suriya. Bi sbuthathe Farhan Haq mırle; Hano maşıqlo dıkmhalıx laf qıdam’yo u ahna kubcina dmi’akdina dgıdowe şuşoto bu nomusano-şuşoto dıkmitacbır bıgawe a came wa qalilotho du athro kulle.

U mşalo Emwothoyo mırle’ste; Ulsoyo’yo dmihafdi a qalilotho leşan u terkiwo du kenşo u mnaselan dorşina me qariwo i sbuthathe cama mşale di şultonutho zabnoyto d’Suriya. Me gabo hreno, i rişonotho du Mawtbo di Mşaynutho d’Emwotho Mhaydotho Christina Markus Lassen dkıtyo bebzabno i mathlonitho d’Danmark b’Emwotho Mhaydotho kalyo cali sniqutho du şekolo di şultonutho hathto d’Suriya dmişaklo ma came kulle du athro.