Emwotho Mhaydotho sımla qroyto lanathrawotho dkıtne bu qrobo dımyaqri u ufusqonathe

Emwotho Mhaydotho sımla qroyto lanathrawotho dıkmıştawtıfi lu qrobo b’Libya dımyaqri u fusqono Emwothoyo dıkmonıc dmişadır zayno lu athrano dkıtyo bıqrobo.

 Camgabıdathe, Rusya dımakadla dlayto şroyo folhoyo lu kriz d’Libya, Fransaste mzaharla cali tahrazto d’Suriya, dkiba dşufco lu athro d’Libya.

 U malolo d’Emwotho Mhaydotho Stefan Dojarik, mahwele ilothnihutho dkıtle u tukoso emwothoyo ma taşrore haroye dcalu menyono celoyo da zayne u jatawiye dıkmişadri la tıre gabe saqıbloye d’Libya. Dojarik bu knuşyo dsımle athmıl lu tboco froso mzaharle mu şedoro du zayno uda jatawiye l’Libya, u mawdacle du medano dyoşo qrihoyo lu fusqono d’Emwotho Mhaydotho di şato da 2011.

 Dojarik bu mamlayde, sımle qroyto la hadome du kenşo emwothoyo dmafiti la haye u fusqono d’Emwotho Mhaydotho dıkmonıc u şedoro d’zayne lu athro d’Libya, u mzaharleste du dyoşo du fusqonano gıdmaqşe u qrobo ugıdmamte cam ruhe netije mahişonitho lu camo d’Libya.

 Me gabo hreno, u waziro di baroyutho d’Rusya Sergey Lavrov, makadle du kriz d’Libya laybe dmışre ba darbone folhoye. I wazirutho di baroyutho d’Rusya bu buyono dıfrısla, mawdacla d’Lavrov wu rişono du parlamento d’Libya Caqila Saleh, banesore dhawilın bu darbo du talafon, makadlın dıklozım dmisarhıb bu tuyobo dı diyalog mawthrono bi mıştawtfonutho da gabe folitiqoye kulle d’Libya.

Mxasra hreto, u waziro di baroyutho dı Fransa Jean Yv Lö Drian mırle; U senaryo d’Suriya kmikarır b’Libya, wi aykanoyutho du athrano mahişonithoyo. Lö Drian bu mamlo dsımle bu mawtbo da senatore Frasnşoye, mzaharle di aykanoyutho b’Libya gıdquşyo zıd u gıdımhadıdo Urifi, ida dlo dıcri a tre gabe saqıbloye d’Libya li tablitho da bazare.