Emwotho Mhaydotho simla qroyto l’Darimsuq dmitaklin a teşniqe

DARIMSUQ — Najat Rochdi dkıtyo i tahlufto du mathlono dilonoyo du notarozo gawonoyo d’Emwotho Mhaydotho-Antonio Guterres b’Suriya, sımla athmıl mamlo bu yawmo Emwothoyo lu snodo da dıbhe da bnaynoşo dmafiti b’teşniqe barbroye. Bu mamlayda Rochdi tlıbla garantiye qonunoye leşan dmitaqimi a teşniqe b’Suriya.

Bebzabno bi qroytathe Najat Rochdi dmahwela awyutho cama bnaymothoye d’Suriya kulle dmafiti b’rdufye u teşniqe bu athro, sımla’ste qroyto l’Darımsuq dmaglıyo cali şrorutho, bnişo d’naqla hreto dlo mikarıri a hawbani u mırla; İ çasara dmahwıyolın a dıbhani, kıtulbo lubobo l’dactith leşan dmihathıth u neshonathe.

İ tahlufto d’Gier Piedersen Rochdi mırla’ste; Gawonoyith b’Suriya, sim teşniqe sistematik ba hbuşye du rejim catiqo d’al Asad wu camlano, hawbo rabo mqabıl di noşutho’yo. A kewe nafşoye lıkmicalçi dlo mi kinutho, dlo mu şlomo u dmitagle cali şrorutho, umu hkomo dani dıktucni i mşalutho da hawbani.

İ mşalonitho Emwothoyto Najat Rochdi bu huthomo kımmo; Calathe kito sniqutho rabtho l’maşıqlo du şuhlofo u l’reforme ba qonune du nomuso esonoyo d’Suriya leşan dmi’akıd, dgımitaqimi a gunhani bu athro. Cal hano u darbo ihidoyo’yo dmitathkıri a bnaynoşo dhuwlın ruhaye qurbono leşan i kinutho.