Emwothoyo Mhaydotho grışla u zuhoro cali aykanoyutho du camo u mawdacla, dhol 90 ba mo ma Suriye kıhoyın tahte du xtuto di faqirutho

NEW YORK – U qrobo dımdawamle eşne yarixe b’Suriya u acme’ste a tedbire dmahti mu macırbo calu athro mcal fothe du qedomo qaşyo du rejim catiqo d’al Asad, huwlın husrone rabe bu standard da haye yawmoye du camo d’Suriya. İ sbuthathe’ste, grışle Hanny Megallay dilonoyith u zuhoro acla.

Megallay dkıtyo mşalo mu Komisyon Emwothoyo da buhone uda buqore cal Suriya mırle; Adyawma hol 90 ba mo du camo d’Suriya kıcoyış tahte du xtuto di faqirutho u kıhoye u yawmo cal 2 dolare. İ aykanoyuthathe, kımadilo dkito ucdo sniqutho msarhabto zıttır me kull naqla dmitaqimi a tedbire dmahti cal Suriya.

U mşalo Emwothoyo bıthır bu dcorayde me Suriya l’New York, grışle u zuhoro cala tedbirani dmahti calu athro u dıkm’athri cal ba milyone dıbnaynoşo dlatte lo mcaş u loste şuğlone. Awkith a tedbire dmahti cal Alasad, kım’athri dilonoyith cala Suriye dkubci dbnonın u dımhathıthi u athrathe.

Me gabo hreno u tukoso Emwothoyo da Zedqe Noşoye-HRW sımle qroyto lu Huyodo d’Urifi dımhalıq i dawse qamayto leşan u teqimo da tedbire cal Suriya u grışle’ste u zuhoro, mıqa a tedbirani kımaklın u şuşoto du athro u dıkmahrıwi i aykanoyutho di ciyeşe da bnaymothoyayde.