Erdoğan huwole amro lu gayso dmohın sfitho du Yawnan

İ mwatyutho du qrobo dkito bayn Turkiya u lu Yawnan mamtela dhowe qatro bayn du rişqutno d’Turkiya Erdoğan u la rabayhaylawotho du gayso d’Turkiya.

Me gabo hreno bu zabno dkımdawmo imwatyuthathe Amerika mawdacla dı maqımla u ambargo du zwono da zayne me cali gozarto d’Qufrus, awkith Qufrus kiba zawno a zayne dkıbco.

Bıthır mi mwatyutho dı qaşyo bayn lu Yawnan u l’Turkiya u megabo hreno Fransa dımşadarla i sfitho rabtho du qrobo lu yamo mıscoyo xıd snodo lu yawnan mawdıc d’Erdoğan nafıqle qatro anaqa cama rabayhaylawotho du gayseyde.

Lfuth hın mu tboco froso bu zabno dı Fransa mawdacla dımşadarla i sfitho du qrobo lu yamo mıscoyo u rişqutno d’Turkiya Recep Tayip Erdoğan hule amro lu gayso dmohın sfitho du Yawnan awste dı madrın tayısto mdu Yawnan. Elo a rabayhaylawotho rfıdlın u amrano lı manhatlın la haye.

Kamhe lo belhude u camo latyo thınihoyo ma zawce dıksoyım Erdoğan elo hın ma rabayahaylawotho du gaysoste latne thınihoye mu mede dıksoyım.

Metul bu zabno haroyo a natijat dıkfırsi a şırak da statıstike kmahwın da qole dıkmitahwın lu gabo di AKP nahiti laltah me 40 bamo, awste lfuth i şırke d’Awarasya a qole dıkmoyıd Erdoğan nahiti l’35 bamo.

Bu zabno di mwatyuthathe dkuyo bayn Erdoğan u la rabayhaylwotho u lu Yawnan u Fransa Amerika mawdacla dmaqımla u ambargo dkito cali Gozarto d’Qufrus da Rum. Awkith bıthır mathe i Gozarto kiba zawno u zayno dkıbco laşan dımdafco a thumeyda mqabıl d’Turkiya u ğer hayle.

Bi mawdconutho dhule u waziro di baroyutho d’Amerika Maik Pompeo mawdacle dı maqımlın u ambargo dkıtwo cal Qufrus hani 33 ışne. Pompeo karıx calu rişono di Gozarto d’Qufrus du Yawnan Nikos Anastasiades u mawdaclele u fusqonano d’Amerika.

Xıd qulnaqa Turkiya mahwela hfuxyo mqabıl du fusqonano dmıdla Amerika.