Erdoğan masrahle lı 11 botaysawbe mdabrone hathe

Bu zabno dkımdawım u zmomo di masırhonutho dımşalo li bethsawbo d’Boğaziçi, u rişqutno Turkoyo Recep Tayyip Erdoğan masrahle L’11 botaysawbe hrene mdabrone hathe.

 Bcayni zabno camgabe dıkımdawmi atagliyotho wa hfuxye mqabıl di sbuthathe, bne tarte fakultat hathe bi bethsawbo d’Boğaziçi.

U fusqono d’masrıh mdabrone hathe L’11 botaysawbo fris bi sfaryawmo ruşmoyto d’Turkiya.  Mawdıc dmid fusqono dmişatıs 2 fakultat bi bethsawbo d’Boğaziçi hdo du huquq u hdo du komunikasyon. Calathe i tahbartho da yolufe bi maqırhonutho dfrısla mırla; Bu zabno lo huquqi du makthabzabno di bethzawbo d’Boğaziçi, kmıftıh fakülte hathto.

Hani yarho kımdawmi a tagliyotho mqabıl du rişqutnu Turkoyo Erdoğan dımasrahle mşalo li bethzawbo d’Boğaziçi dkıtyo mu gabayde AKP. A yolufe wa yadıcthone dlo maqbılın i masırhonuthathe ktulbi du rektör dmasrıh Melih Bulu dmıstacfe mi wolithayde. Cala şuşotani Profesör Doktor Yaman Akdeniz mawdacle, bu qonuno du mınyono da 2309 hiw salahiye rwıhto lu rişqutnu.

Kibe dsoyım kull mede u dsoxır fakultat u fotıh hathe hayko dobıc. Me gabo hreno i methcadronutho d’Boğaziçi frısla egartho ftıhto lu rişqutnu d’Turkoyo, u sımla qroyto dsoyım esore baroye acma, lo bdarbone lo baroye.

U mırla hat lathat malko wu ahnaste latna a cabodaydox uba melani mdawamla; Hat kıtlox hani 19 ışne hasinutho bıthre du satrano kımhawrıt u kmıjğolıt. Elo ahna latlan hasinutho. A hadome du gabaydox kmohın ba rafsat la falohe du macdan b’Soma elo ahna cama falohe mıdlan duktho ba tagliyotho. U rişono zawgoyo catiqo d’HDP wa gelyunore b’darbone lo qonunoye kmıskatte ba hbuşye elo ahna dlo zıctho kmazcıqina i şrolutho, u mqabıl da qoyume kullena.