03/02/2021

Erdoğan mawdacle gseymi fulhone laşan nomuso esonoyo hatho lu athro d’Turkiya

U rişqutno Turkoyo mawdacle, du gabayde d’AKP wu gabo bnayqyomayde d’MHP kit cal qariwo dmabdın fulhone, dımqadmi nomuso esonoyo hatho lu athro.

 U nomuso esonoyo d’Turkiya lo şafıc acle heş arbac eşne, u Erdoğan kobıc dımşakıl ha hatho. Bi sbuthatheste kmitawdıc, du rişqutno kobıc belhude dmaqwe u haylayde zıttır b’Turkiya.

U rişqutno d’Turkiya Recep Tayip Erdoğan mawdacle, du gabayde u di MHP kit cal qariwo dmabdın fulhone leşan u şekolo d’nomuso esonoyo hatho. İ şultonutho d’Ankara layimo lknuşyo dımdawamle 4 şoce leşan dmıdrış u mkono du şuhlofo du nomuso esonoyo hathto du athro dıkmitıstacmıl heş man 1982 bıthır mu inqilab folhoyo dsımwo b’Turkiya.

Bu mamlayde Erdoğan mırle; Qrihoyo du mabuco da qetre d’Turkiya, du nomuso kull naqla kıthiw mani dıksaymi u inqilab. Calathe balki ucdo u zabnoyo dmitabdın adroşe du tuyobo d’nomuso esonoyo hatho. En dmotina l’awyutho camu gabo muttafikaydan, kit dmabdena fulhone bu dactith leşan tuyobo d’numoso hatho.

Ba 2017 sımwo şuhlofo, leşan dmizıl me sistem du parlamento l’sistem di rişqutnutho walaw a gabe saqıbloye kulle mahwewolın hfuxyo. U şuhlofano dkobıc AKP u MHP dsaymi bu nomuso esonoyo du athro, u nişayde du rişqutno Erdoğan, zıttır dhowele mşaluthoyo.

Erdoğan dkıtyo cımre 66 eşne, hawiwo rişwazire ba 2002 u bu şıkılano bdewole dmahıt u duyoqo du athro lidothe cama 83 milyone dıbnaynoşo dıkhoyın ebe. Bu yarho d’Hziron da 2023, kmıntır dmisomi a guboye du parlamento u di rişqutnutho u bu normal, klozım u dawro d’Erdoğan dtoyım ba 2028 en dothe dlo minaqe naqla hreto.

Erdoğan, heş lo xasır guboye, elo u snodo dkıtwe meqım eleste kull dkothe knoqıs dilonoyith bıthır mu inqilab folhoyo dımnasewo dmisım cal Ankara ba 2016 ubu msokayde da folitiqore saqıbloye, da gelyunore u kull farsufo dkıtwole renyo frişo me di şultonuthayde.