Erdoğan mqadamle rmoyto leşan dmitaqimo i hasinutho d’arbco folitiqore saqıbloye

U rişqutno d’Turkiya Recep Tayyıb Erdoğan, mqadamle rmoyto leşan dmitaqimo i hasinutho d’arbco folitiqore saqıbloye.

A farsufani’ste, u qoyumo Armınoyo bu gabo Demoqratoyo da Came-Garo Paylan, Meral Danış Beştaş, Hüda Kaya wi folitiqorto di DBP Salihe Aydeniz.

Lfuth u tebo dfrısle u Qentrun da Buhone d’Stokholm leşan u Şlomo, i rmoyto dımşadarle u rişqutno Turkoyo Erdoğan leşan dımaqım i hasinutho d’4 qoyume d’gabe saqıbloye matyo ucdo lu parlamento du athro. An 4 qoyumani’ste-3 di HDP’ne Garo Paylan, Meral Danış Beştaş u Hüda Kaya wi harayto’ste di DBP- Salihe Aydeniz’yo.

En dothe u parlamento dmaqbıl i rmoytathe d’Erdoğan cali hasinutho dan 4 qoyumani, gıdmıhkomi b’dacwat frişe-ma thome dkito mqabıl d’dıthe mi şultonutho d’AKP u MHP. Mu zabno du gabo di CHP udi MHP snıdwolın ba 2016 u renyo di AKP leşan dmitaqimo i hasinutho da qoyume, ftih ğalabe dacwat mqabıl da qoyume dkıtne saqıbloye du renyo di şultonutho d’AKP.

A msokani’ste mşarewolın dilonoyith, bıthır mıd Erdoğan twırwole i şalyuthzayno cama Mharbone Kurdoye ba 2015 wi inqilab dımnasewo dmisım ba 2016 cal Ankara. Bu yarho d’Odor’ste mqadamwo talab lu bethdino nomusoyo dmımnıc u gabo di HDP. Bu tarano’ste ba mowat d’folitiqore u hadome di HDP midiwo ma wolyothathe u mahtiwo ba hbuşye.