ESU frısle buyono cala hjome dıkseymo Turkiya calu garbiyo du Iraq

U huyodo Suroyo d’Urifi ESU frısle buyono dıkrıhle ahjome dıksaymo Turkiya calu garbyo du Iraq u calu garbay madınho d’Suriya.

ESU bu buyoneyde ksoyım qrayto l’Amerika l’Emwotho mhaydotho u lu ray dıbritho dmaklın ahjomani dıksaymo Turkiya cala came.

ESU frısle u buyoneyde lu ray dıbritho u la rişone da hayle gawonoyith.

U gayso Turkoyo mabdele cuqobo calu garbyo du Iraq 16 bu yarho d’Hzirın cal ışme dmohe a haylawotho du ağuno da Kurdoye di PKK.

Bu cuqobano d’Turkiya dmıla nişo a dukothe du camo Suryoyo-Othuroyo mahıtla zuctho bgawe da came dıkcoyış ba qıryawotho du garbyo du Iraq.

ESU komır u gabo di AKP hani zıttır me hısar ışne mıdle nişo lıruhe dkobış a arcotho da came dıkhoyın ba athrawotho şbobe xıd Suriya wu Iraq. Bu kboşano ksaymo şuhlofo demografoyo bu şuhlofo du nqolo da bnaynoşo me dukotho lı duktho hreto.

Bu buyono kmitahwe xıd mathel u kboşo d’Cafrin b’Suriya. ESU bu buyoneyde komır mu zabno du hjomo dı Turkiya dsımla calu garbyo du Iraq zıttır me 30 qıryawotho du camo Kaldoyo-Suryoyo-Othuroyo xalın ma comurathe mi zıctho du qatlo. U camo da qıryawothani laşan dhoye mşayno cbir dımgalwe l’Zaxo u l’Nuhadra u ğer dukotho.

İ sbuthathe gıdhuyo golutho du daşto d’Ninwe dhawyo me quma marıhbone dı Dacış.

U camo Kaldoyo-Suryoyo-Othuroyo dıkhoye ba qıryawothani u camo dı galwewole mu qtolğenzo da 1915 u 1924 dhawi b’Hakkari.

Mawxa u Huyodo Suroyo d’Urifi ksoyım qrayto la rişone du athro du Iraq klozım maydi tadbire qaşye mqabıl da hjomani, u dımharıri a comure da dukothani, dmaklın a hjomani.

Bu huthomo ESU ksoyım qreyto l’Amerika, l’Urifi, u l’Emwotho mhaydotho dımqafın şroye amine la came dıkhoyın bi fnithathe.