26/06/2021

ESU mşadarle egartho lu parlamento d’Urifi calu Sayfo dsim calu camaydan ban 1915

U fırco da esore baroye du wahdo d’Urifi-du Huyodo Suroyo d’Urifi ESU, mşadarle egartho lu parlamento d’Urifi calu Sayfo dsim calu camaydan ban 1915.

Camgabe du parlamento, ESU mşadarle  egrotho la qoyume dan athrawotho d’Almanya, Hollanda, Austoria, Swisra, Fransa, Beljika u Britania.

Bi egarthathe dımşadarle u Huyodo Suroyo d’Urifi u fırco da esore baroye lu parlamento ula qoyume d’athrawotho frişe du Huyodo d’Urifi, bşıkıl rwiho mahkele calu qtolğenso qamoyo dsımwo bu makthabzabno dbritho calu camaydan, calan Armınoye u Pontus Yawnoye mi mamlaxtho da Cuthmanoye bu zabno du qrobo qamoyo dbritho wu mınyono da qtiloye da 3 camani. Bi egarthathe camgabe d’mathkır u mafqono qaşyo dhawi calu camo u aydarbo jbir dımşahlıf i tawdithaye, mawdacle’ste du Papa du Vatikan mawdewole bu qtolğenso u mahıtwole ışme; u qtolğenso qamoyo du doro da 19.

Wu camaydan, kımathkır kull şato a Sohdayde 15 bu yarho d’Hziron, an Armınoye 24 bu yarho d’Nison wa Yawnoye’ste kımathkırile 19 bu yarho d’İyor. Bi egarthathe friş duktho aydarbo mnase dmılhoyo i hiyoyutho, i tawditho wi mardutho du camaydan, u tehriwo da dukothayde a tawdithoye u makthabzabnoye ubi siyasathe i hdonoyto d’Turkiya, maşewo tahrazyotho du qşoco udu tefşiro da qalilothani bu cnufyo.

Bu taro da tahrazyothani dheş hol adyawma kımdawmi, Turkiya heş kımankıro u qtolğensano. Wu 4 bu yarho d‘İyor da 2020 mathkarwole u rişqutno Erdoğan, dgımoyıd i sbutho du qtolğenso li ido u lıgtore da came dmaxlase mu Sayfo dfayışi b’Turkiya u mahıtwole remzo di marhıbonutho aclaye u mırwole; U mınyonathe naqıs ğalabe, elo heş kito menaye. Leşan a hawbani dlo mikarıri, klozım u kenşo Emwothoyo djubro Turkiya dluqyo bu dacbarayda u dmawdıyo du retorikayda belhude gıdxolıq qetre quma.

Bi egarthathe friş duktho lu kboşo d’Turkiya calu garbyo d’Suriya, u şedoro d’marhıbone l’Libya wu jğuşyo dıkxulqo bu NATO, a hçome dcalu garbyo du Cıraq, a hçome da melayda mqabıl d’İsroyel ucamani’ste u şedoro dfolhe l’Azerbaijan. Bu huthomo mawdıc ba fulhonani dıksoyım u fırco da esore baroye d’ESU b’Urifi, kobıc dımşaçıc li mawdyonutho ba zedqe, bi şrorutho du makthabzabno ubi kinutho bu Madınho Mescoyo bnişo du camaydan dqodır dımdawım i ithuthayde u klozım dhowe mawdyonutho bu qtolğensano dsim calu camaydan, calan Armınoye u Pontus Yawnoye.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…